Тәмлетамак. Рәмзия Холматовадан пылау рецепты

– Пылауны яратмаган кеше юктыр. Ләкин һәркем аны үзенчә пешерә. Мин үземнең рецептны тәкъдим итәм. Аның үзенчәлеге – учакта пешерелүендә. Сез дә мин өйрәткәнчә пешереп карагыз әле. Бик тәмле һәм туклыклы килеп чыга. Пылау өчен итне жәлләмәскә кирәк. 
Ингредиентлар: 
1 кг сыер ите һәм шул ук күләмдә суган. Суган күбрәк булган саен, пылау тәмлерәк чыгачак. Чөнки суган белән теләсә нинди ризык сусыл була. 
1 кг кишер, 1 кг кызыл дөге, 500 мл көнбагыш мае, 1 кап тәмләткечләр, 2 баш сарымсак, бер аш кашыгы тоз һәм иң мөһиме – чишмә суы. 
Итне элпәсеннән чистартып, кечкенә кисәкләргә турыйбыз. Суганны ярымбоҗралап турыйбыз. Казанга көнбагыш мае салып кыздырабыз, әзерләгән ит белән суганны салабыз. 
Кишерне әрчибез һәм саламлап турыйбыз. Ит өстенә салып, болгатабыз, 3-5 минут кыздырабыз. Тәмләткечләр һәм тоз сибәбез. 
Яшелчә белән ит өстенә, 2 см чыгып торырлык итеп, кайнаган су агызабыз. Капкачын капламыйча гына 20-25 минут пешерәбез. Вакыт-вакыт болгатып алабыз. 
Дөгене яхшылап юабыз һәм 15 минутка салкын суга салып куябыз. 
Ит белән яшелчә пешеп җитәрәк, дөге өстибез. 
Дөге өстенә кайнап торган су агызабыз (су дөге өстеннән 1 см биегрәк булсын). Казанны каплап, 20-25 минут томалап пешерәбез. 
Вакыты җиткәч, уртасына әрчелмәгән бер-ике сарымсак башы батырып куям. Тагын бер 5 минут пешерәм дә сүндереп куям. Болгатып тарелкаларга бүләсе генә калды. Телне йотарлык пылау килеп чыкты! Ашларыгыз тәмле булсын!

Фото– Рixabay.com