Кышны җылыда үткәрербез

– Газүткәргечләргә һәм объектлар­га хезмәт күрсәтү, оешмаларда һәм кешеләрнең өйләрендә газ җиһазларын алмаштыру белән шөгыльләнүдән тыш, егетләребез бу көннәрдә газ торбала­рын буяу белән дә мәшгуль. Әлеге эшләр Мөслимдәге Кооператив, Пятилетка, Бакча, Банк, Красноармейская, Татар­стан, Набережная, Тукай, Урожайная урамнарында башкарылды, – ди район газ хезмәте җитәкчесе Рәшит Гарипов. – Барлыгы 5 мең 100 данә газ баганасы, 6 километрдан артык газүткәргеч торба буялачак. Буяу эшләре кыш көне дә алып барылачак. Буяулар сыйфатлы, 25 градус салкында да эшләү мөмкинлеге бирә.

Оешманың авария-диспетчер хезмәте тәүлек дәвамында эшли. Биредә тәҗрибәле мастерлар хезмәт куя. Ел дәвамында авария-газ хезмәте сигнал буенча 370 мәртәбә – авария урынына, 105 тапкыр газ җиһазларын ремонтлау­га чыккан.

– Авыллардагы слесарьлар да уча­стокларында тел-теш тидермәслек итеп эшлиләр. Газ исе чыкканын сизсә, ха­лык шунда ук “04” номерын җыя. Без, әлбәттә, тиз арада чарасын күрәбез. Кайвакыт кешеләр яңа газ плитәсе, газ җиһазлары, газ колонкалары са­тып ала, аны газга мөстәкыйль тоташ­тыра. Бу катгый тыела! Үзегезнең һәм башкаларның гомерләре белән уйнама­сагыз иде! – ди Рәшит Гарипов.

Газ хезмәтендә эшләүчеләр про­филактик эшләрне ял һәм бәйрәм көннәрендә дә башкара. “Гадәттән тыш хәлләр булмасын өчен газчылар елга бер мәртәбә газ кергән объектларда (йорт, фатир, мунча) газ плитәсенең, газ котелларының төзеклеген тикшерә. Халыкка йортны үз белдегең белән газлаштыру, үзгәртеп кору, газ при­борларын, баллоннарны һәм краннар­ны алыштыру катгый тыела”, – ди газ хезмәткәрләре. Газ приборлары урнаш­тырылган бинаны, тиешле оешмалар белән килешмичә, кабат планлашты­ру, газ приборлары конструкциясенә үзгәрешләр кертү да тыела. Төтен һәм җилләтү каналларын чираттагы тикшерүләр үткәрмичә, газдан файда­лану да куркыныч.

Газ җиһазлары сатучыларның за­консыз гамәлләре ешайды. “Газ хезмәтеннән” дип таныштырып, йорт­ларда газ җиһазларын тикшереп, нин­дидер датчиклар сатып алырга тәкъдим итүчеләр – алдарлар барлыкка килде. Еш кына мондый приборлар шактый файдасыз булып чыга.

– Газ хезмәтеннән килгән кешеләр мондый приборларны тәкъдим итми. Кеше алдап йөрүчеләрнең саткан җиһазлары эшкә яраксыз һәм күп оч­ракта бик кыйммәткә төшә. Без газ җиһазларын тикшерү эшләре була­чагын халыкка алдан хәбәр итәбез. Хезмәткәрләребез беркайчан да акча белән эш итмиләр. Алар махсус киемдә йөриләр, таныклыклары да бар. Газ хезмәте өчен түләү квитанция аша гына башкарыла. Йортыгызга кергән кешеләргә карата шик туса, стационар телефоннан – “04”, кәрәзле телефоннан “104” номерына шалтырата аласыз, – ди Рәшит Гарипов.

Халыкның игътибарсыз булуын да билгеләп үтә газ хезмәткәрләре. Җәй көне ихатага печән яисә төзелеш ма­териалы алып кайтканда газ торбала­рын имгәтү очраклары күзәтелә икән. “Бу – безнең өчен зур мәшәкать, кеше өчен – акча чыгару. Чөнки килгән зы­янны кеше үз кесәсеннән түләргә тиеш. Капка төпләрендәге газ торбаларын күтәртергә кирәк, дип килүчеләр дә бар. Проект буенча эшләнгәч, монда без бернәрсә дә эшли алмыйбыз”, – ди газ хезмәткәрләре.

Күпфатирлы йортларның һәммәсендә сигнализаторлар бар. Өйдә әз генә газ исе чыгуга сигнализаторлар тавыш бирә башлый. Сигнализаторлар­га һәм ике контурлы котелларга “Та­трегион-сервис”, “Бәрәкәт” оешмалары хезмәт күрсәтә.

Лилия ШӘЙМИЕВА.

Фото – газ хезмәте архивыннан