Башкаларга юл бирә белик!

– Нинди генә чара­лар куллансак та, спиртлы эчемлекләр кулланган килеш транспорт белән идарә итүче райондашларыбыз саны ки­меми. Ел башыннан алко­гольле эчемлекләр куллан­ган хәлдә транспорт белән идарә иткән 28 кешене тот­карладык. Аларның берсе – хатын-кыз. Машина йөртү хо­кукы алынган килеш руль ар­тына утыручылар да бар. Өч ай эчендә “правасыз” маши­на белән идарә иткән җиде кеше тоткарланды, – ди районның ДАИ җитәкчесе Ай­нур Хәйретдинов.

– Кешенең спиртлы эчемлекләр куллануына үзе генә түгел, башкалар да гае­пле. Берәр бәйрәм җиттеме, табынга спиртлы эчемлекләр чыга. Дуслар, туганнар бер- берсен сыйлый. Бәби тәпиен юа, аракысыз туй да күңелсез кебек тоела. Начар гадәт бу. Идән астыннан көмешкә са­тучылар да байтак. Кибет аракысы зыянлы дип, ха­лык көмешкәгә күчеп бара. Әйтерсең, анысы файдалы! – ди Мөслимдә гомер итүче Зөлфия Әхмәдуллина.

Районның ДАИ инспек­торлары билгеләп үткәнчә, юл хәрәкәте кагыйдәләрен үтәмәүчеләр саны да арткан. Ел башыннан юл хәрәкәте кагыйдәләрен бозган – ти­ешле урында җәяүлегә юл бирмәгән, светофорның кы­зыл утына чыккан унөч шоферга административ беркетмә төзелгән. Рейдлар барышында теркәлгән иң күп хокук бозулар – шоферларның иминлек каешын эләктермәве һәм балаларны махсус кресло­дан башка йөртү.

– ДАИ линиясе буен­ча штрафларны вакытын­да түләмәүчеләр белән дә эш алып барабыз. Суд при­ставлары белән берлектә уз­ган рейдлар вакытында ике кешенең машинасына арест салынды, өч райондашыбыз сак астына алынды. Ел ба­шыннан шундый төр штраф­ларны түләмәгән 29 кеше җаваплылыкка тартылды. ДАИ штрафларын вакытын­да түләгәндә сумманың яр­тысы гына алына. Ә штраф түләүдән качып йөрүчеләрне тоткарлаганда түләү вакыты узган була. Алар штрафны артыгы белән түләргә тиеш була, – ди Айнур Хәйретдинов.

Көннәр җылыта төшкәч, машинада чабулаучылар­га мотоцикл һәм мопедлар­да узышучы яшүсмерләр дә кушыла. Баласына мото­цикл алып биргән әти-әнине җәһәннәмгә юллама бирүчегә тиңләргә була. Транспорт белән идарә итәргә хокукы булмаганнар бик еш авариягә тарый.

– Спиртлы эчемлекләр кулланган килеш тоткар­ланган ир-егетләр: “Әз генә эчтем, кичә эчкәннеке кал­гандыр”, – дип хәйләли. Ә яшүсмерләр тизрәк качу ягын карый. Былтыр алар “ярдәме” белән Тукай ура­мындагы шлагбаум берничә тапкыр сынып төште. Мо­пед белән 16 яше тулган һәм аны йөртергә хокукы булган яшүсмерләр генә идарә итә ала. Зур юлга велосипед белән 14 яше тулганнар гына чыга ала. Кагыйдәне бозган өчен балаларның әти-әниләренә 5 мең сумнан 15 мең сумга кадәр штраф салына.

Юлларда игътибарлы булу гына җитми, үзара ихтирам­лы булу да кирәк! Башкалар­ны узам дип түгел, юл бирәм, дип яшәгез!

Лилия Шәймиева.

Фото - Pixabay.com