Кечкенәдән үҗәт Шамил

Шамил – Мөслим егете. Бик күп малайлар кебек ул да балачакта хоккей һәм футбол уеннары, волейбол белән мавыга. Мөслим урта мәктәбен тәмамлагач, Шамил укуын Яр Чаллы шәһәрендә – физкультура колледжында дәвам итә. Хәрби хезмәтне егет Георгиевск шәһәрендә – тимер юл гаскәрләрендә үтә.

– Безнең нәселдә спорт юлын сайлаучылар булмаса да, җырчылар һәм биючеләр шактый. Бию түгәрәгеннән качып диярлек спорт дөньясына киттем. Спортка тартылганнар физик яктан да, рухи яктан да сәламәт була, – ди Шамил Мирсалихов.

Хезмәт юлын ул балалар һәм яшүсмерләр спорт мәктәбендә башлый, соңрак аны район Башкарма комитетының инфраструктур үсеш бүлегенә баш белгеч итеп билгелиләр. Тик спорт дөньясын яратканнар башка өлкәдә үзләрен ниндидер бер кысада итеп хис итәдер, мөгаен. Бүген Шамил янәдән балалар белән дәресләр, тренировкалар үткәрә.

– Алда безне зур чара – мәктәпләрнең футбол лигасы (ШФЛ) көтә. Бу бәйгегә ныклы әзерлек таләп ителә. Кул астындагы балаларның һәммәсе өметле дияр идем. Спорткомплекс мәйданы белән чагыштырганда, футбол кырында алар үзләрен тагын да иркенрәк тоталар. Бер йодрыкка тупланган команда һәрвакыт үзенең уңышлары белән сөендереп тора. Күптән түгел Әлмәт шәһәрендә, Сарман районында булып кайттык, укучылар сынатмады, – диде Шамил.

Лилия Шәймиева фотосы

Тулырак «Авыл утлары» газетасының 2025 ел 28 февраль саныннан укыгыз.