Районга 2020 доза гриппка каршы вакцина кайтты: кайсысы кемгә һәм ни өчен кирәк?

Кемгә нәрсә ясалачак?

«Ультрикс Квадри» препараты медицина хезмәткәрләре, йөкле хатын-кызлар, балалар бакчаларына йөрүче нәниләр һәм башлангыч сыйныф укучылары өчен каралган. Калган препаратлар да риск төркемнәренә кергән затларга (өлкән яшьтәге кешеләргә, хроник авырулары булганнарга) тәгаенләнгән.

Вакцинациянең асылы нидә?

Район хастаханәсенең баш табибы Дамир Сөләйманов аңлатканча, вакцинация — иммун системасын инфекция белән «танышу» процессы.

• Организмга чит компонент кертелә;
• Иммунитет антитәнчекләр эшләп чыгара һәм «хәтер күзәнәкләрен» формалаштыра;
• Соңрак организмга чын вирус эләксә, система аны тиз танып ала һәм нейтральләштерә. Нәтиҗәдә кеше бөтенләй авырмый яки авыруны җиңел формада кичерә.

«Вакцинация ярдәмендә кешелек чәчәк авыруын җиңде, полиомиелитны бетерде, кызамык, дифтерия, коклюш кебек куркыныч инфекцияләр белән авыру мөмкинлеген киметте», — дип искәртә табиб.

Ни өчен ашыгырга кирәк?

Гриппка каршы иммунитет бер көндә генә барлыкка килми. Вакцина ясатканнан соң саклагыч антитәнчекләр формалашу өчен 2–4 атна вакыт кирәк. Шуңа күрә прививканы сентябрь-октябрь айларында, эпидемия сезоны башланганчы ясатырга киңәш ителә.

Игътибар!

Прививка ясатыр алдыннан мәҗбүри рәвештә терапевтка күренергә кирәк. Табиб температураны үлчәячәк, анамнезны ачыклаячак һәм булачак реакцияләр турында сөйләячәк. Процедурадан соң 30 минут дәвамында медицина учреждениесендә булу зарур — бу сирәк очрый торган аллергик реакцияләрдән стандарт саклану чарасы.

«Кайберәүләр вакцинация үтүгә караганда, авыру яхшырак, дип уйлый. Бу — ялгыш фикер. Инфекцияләр авыр өзлегүләргә, инвалидлыкка һәм үлемгә китерергә мөмкин», — ди район поликлиникасының эпидемиолог ярдәмчесе Миләүшә Ильясова.

Фото: Татар-информ