Россия флагы көне: Мөслимдә йөгереш узды һәм яшьләргә паспорт тапшырылды
Россия флагы көне уңаеннан «Татарстанда җәй» проекты кысаларында «Яшьлек» спорт комплексында зур чара оештырылды
Чарага старт биреп, яшь армиячеләр Россия флагын алып керде, аннары мөнбәрдән Гимн яңгырады. Район башлыгы Альберт Хуҗин җыелучыларны бәйрәм белән котлап, Россия флагы тарихы турында сөйләде.
– Дәүләт флагына ихтирамлы караш Ватаныбыз белән горурлануыбызны күрсәтә... Бүгенге вәзгыятьтә Россия флагы аеруча зур әһәмияткә ия. Ул җилфердәгән җирдә азатлык, тынычлык яшәр! Россия флагы мәңге балкып, җилфердәп торсын! – диде ул.
Гражданлык хокуклары һәм намуслы хезмәт билгеләре
Тантананың мөһим өлеше булып 14 яше тулган егет-кызларга шәхесне раслаучы мөһим документ – РФ гражданины паспортларын тапшыру булды. Моннан тыш, республиканың Электрон мактау тактасына кертелгән бертөркем райондашларыбызга таныклыклар бирелде. Мондый таныклык алучылар арасында хезмәттәшебез – редакторның дубляж буенча урынбасары Рүзилә Бәхтиярова да бар.
– Дулкынлану һәм горурлык, шул ук вакытта шатлык хисләре кичерәм. Иң мөһиме – дөнья тыныч, якыннарыбыз һәрвакыт янәшә булсын! – ди коллегабыз.
Массакүләм йөгереш һәм күңел ачу программасы
Тантаналы өлештән соң спорт комплексы территориясендә йөгереш башланды. Чарага гаиләләре белән килүчеләр дә күп иде, шулай ук вакытларын файдалы үткәрергә теләгән яшь буын вәкилләренең күп булуы сөендерде. Күңелле музыка астында теләге булганнарга аквагрим ясатырга мөмкинлек тудырылды.
Патриотик тәрбия һәм коллектив бердәмлеге
Чарада катнашкан оешма-предприятие коллективларының активлыгы билгеләп үтелде.
– Районда нинди генә чара узмасын, безнең коллектив һәркайсында тулы составта катнаша. Россия флагы – безнең горурлыгыбыз! Балаларны Россия флагы тарихы белән таныштыру һәм аларда патриотик хисләр тәрбияләү максатыннан да мондый бәйрәмнәр зур роль уйный. Авырлыкларга бирешмичә, чикләребезне саклап, ышаныч белән алга баручы хәрбиләр, махсус хәрби операциядә катнашучылар өчен дә бәйрәм ул. Россиянең дәүләт флагы астында һәрвакыт тынычлык һәм гаделлек тантана итсен! – диде Мөслим гимназиясе директоры Азат Мирзаянов.
Лилия Шәймиева фотолары
Безнең телеграм каналга кушылыгыз! Телеграм-канал
Нет комментариев