Самокатның үз юлы

Җәй көне самокатларда яки велосипедларда йөрүче балалар саны күзгә күренеп арта. Яше тулганы да техника йөртә, тулмаганы да. Районның ДАИ бүлегеннән хәбәр итүләренчә, май-июнь айларында гына да юл хәрәкәте кагыйдәләрен бозган балигъ булмаган җиде яшүсмер, самокаттан егылып, авыр тән җәрәхәтләре алган.

– Балаларның велосипедта һәм самокатта йөрергә яратуы аңлашыла. Ләкин самокат та, велосипед та – аеруча куркыныч транспорт чаралары. Кайвакыт балалар самокатта юл уртасына – машина каршына ук килеп чыга. Бу бик куркыныч! Балага юлда йөрү кагыйдәләрен әти-әниләр өйрәтергә тиеш, – ди район Башкарма комитеты җитәкчесе Ирек Салихҗанов.

Район хастаханәсенең ашыгыч ярдәм бүлегенә дә көнкүрештәге тән җәрәхәтләре белән мөрәҗәгать итүчеләр саны соңгы арада арткан. Велосипедтан егылып баш мие селкенгән, самокаттан егылып аяк-кулларын җәрәхәтләгән балалар белән бергә өлкәннәр дә ашыгыч ярдәм сорап мөрәҗәгать итә.

Римма Афзалова фотосы