«Бала – төп пассажир!»: Мөслимдә балаларның юл иминлегенә игътибар арта

Чара балаларны автотранспортта йөртү кагыйдәләрен бозу очракларын кисәтүгә һәм юлларда кечкенә пассажирларның иминлеген тәэмин итүгә юнәлдерелде.

Кечкенә пассажирлар – төп игътибарда

Акциядә районның Дәүләт автоинспекциясе җитәкчесе Феликс Мәгъданов, «Юл хәрәкәте иминлеге» ДБУнең Мөслим һәм Сарман районнары буенча бүлек җитәкчесе Алсу Ситдыйкова, шулай ук «Кояшкай» балалар бакчасында тәрбияләнүчеләр катнашты.

Профилактик чара кичке вакытта, әти-әниләр балаларын бакчадан алып киткәндә үткәрелде. ДАИ инспекторлары автомобиль белән килгән ата-аналар белән аралашып, балаларны транспортта йөрткәндә иминлек таләпләрен үтәүнең мөһимлеген искәртте.

Иминлек каештан башлана

Әңгәмә вакытында төп игътибар балалар өчен махсус тотып тору җайланмаларын куллануга юнәлдерелде. Инспекторлар әти-әниләргә баланың яшенә һәм физик үзенчәлекләренә туры килә торган җайланма сайлау, аны автомобильдә дөрес урнаштыру кирәклеген аңлатты.

Кечкенә пассажирны кулга гына тотып яки гади иминлек каешы белән бәйләп йөртү җитәрлек түгел. Юлда көтелмәгән хәл килеп чыкканда, махсус җайланма баланың иминлеген саклауда мөһим роль уйный.

Балаларга – истәлекле бүләкләр

Акциядә балалар да актив катнашты. Алар юл хәрәкәте кагыйдәләре турында сөйләште, иминлек таләпләрен искә төшерде.

Чара ахырында кечкенә пассажирларга истәлекле бүләкләр тапшырылды. Балалар өчен бу очрашу файдалы мәгълүматлар белән бергә матур тәэсирләр дә калдырды.

Имин юл – уртак җаваплылык

«Игътибар – балалар!» кебек профилактик чаралар юл хәрәкәтендә катнашучыларның игътибарын балалар иминлегенә юнәлтергә ярдәм итә. Әти-әниләрнең җаваплылыгы һәм машина йөртүчеләрнең игътибарлылыгы – балаларны юл-транспорт һәлакәтләреннән саклауның мөһим шартлары.

Лилия Шәймиева репортажы. Миләүшә Солтанова фотолары.

Безнең телеграм каналга кушылыгыз! Телеграм-канал

Без "Дзен"да! Дзен