“Җәяүле” профилактик операциясе бара

Мөслимдә “Җәяүле” профилактик операциясе бара. Ул 25 гыйнварга кадәр дәвам итәчәк. “Җәяүлеләр катнашындагы юл-транспорт фаҗигаләре күбрәк тәүлекнең караңгы вакытына туры килә. ЮТФ күпчелек очракта киемдә яктылык кайтаручы элементлары булмаган җәяүлеләр аркасында килеп чыга. Машина йөртүчеләргә дә, җәяүлеләргә дә юл-транспорт фаҗигаләре куркынычын киметү өчен кагыйдәләрне үтәргә кирәк. Җәяүлеләр – тротуарлар яки җәяүлеләр юлыннан, ә алар булмаганда,  юл кырыеннан йөрергә тиеш,” – ди районның ДАИ җитәкчесе Феликс Мәгъданов.
14 гыйнвар көнне Мөслим – Вәрәшбаш юлында юл-транспорт фаҗигасе булды. “ВАЗ-2112” автомобиле шоферы, каршы як полосага чыгып, каршыга килүче “Лада-Гранта” машинасына бәрелә. Нәтиҗәдә “ВАЗ”ның пассажиры авыр тән җәрәхәтләре ала.