Олы Чакмак волонтерлары картлар йортында Иван Купала бәйрәмен уздырды

Россия халыклары бердәмлеге елы, "Традицияләрнең тере җебе" һәм "Игелеккә юл" проектлары кысаларында, Олы Чакмак мәктәбе "Тылсым" волонтерлар отряды Иван Купала бәйрәме алдыннан Мөслим картлар һәм инвалидлар интернат-йортында яшәүчеләр өчен "Табигатьнең шифалы көчләре" темасына очрашу үткәрделәр.

Өлкәннәрнең күбесе өчен Иван Купала бәйрәме, елга буендагы халык күңел ачулары һәм абага чәчәген эзләү турындагы хатирәләр – яшьлек елларының иң җылы истәлекләре. Волонтерлар бу борынгы славян бәйрәменең тарихын сөйләделәр, ата-бабаларыбызның табигать белән никадәр тыгыз бәйләнештә яшәвен искә төшерделәр.

Очрашуның практик өлеше хуш исле саше ясау буенча осталык дәресе булды. Моннан тыш, олычакмаклылар өлкәннәрне яңа җыелган кара карлыган һәм урман җиләкләре белән сыйладылар.

"Җылы гаилә мохитен хәтерләткән очрашуда укучылар өлкәннәргә Купала төне йолалары турында сөйләделәр: чистарыну учаклары кабызу, кыр чәчәкләреннән такыялар үрү, борынгы ышанулар белән таныштырдылар. Әмма сөйләшүнең төп темасы халык медицинасындагы зирәклек булды. Һәркемгә таныш үсемлекләр мисалында иреклеләр аларның гаҗәеп файдалы үзлекләрен аңлаттылар. Очрашу тиз арада җанлы әңгәмәгә әверелде. Өлкәннәр рәхәтләнеп үзләренең рецептлары белән уртаклаштылар, балачакта болыннарда мәтрүшкә җыюларын, кара карлыган яфракларын чәй өчен киптерүләрен, ә мунча себеркеләрен нәкъ менә Аграфена Купальница көнендә әзерләүләрен искә алдылар. Волонтерлар исә фитотерапиянең файдасын раслаучы заманча фәнни тикшеренүләр турында сөйләделәр һәм табигатьнең кешегә үз нигъмәтләрен киләчәктә дә бүләк итсен өчен аңа сакчыл карарга кирәклеген ассызыкладылар. Безнең тәрбияләнүчеләр өчен мондый очрашулар – күңел бәйрәме.

Алар яңа белем генә түгел, ә буыннар арасындагы чикләрне юкка чыгара торган кадерле аралашу да. Өлкәннәрнең үзләренең бай тормыш тәҗрибәсе белән уртаклашканда күзләренең ничек балкыганын, ә яшьләрнең аларны ихлас кызыксыну белән тыңлавын күрү – зур шатлык", - диелә интернат-йорттан алынган хәбәрдә.

"Без аларга күңел җылысы бүләк итәргә дип килгән идек, ә үзебез тормыш зирәклеге белән тулы бай хәзинә алып киттек", – дип, тәэсирләре белән уртаклашты отряд координаторы Миңнур Нәгыймова.

Фотолар - Мөслим картлар һәм инвалидлар интернат-йортыннан.