Яңа ел табыны артында

Яңа елны каршы алу, мул сыйлы табын әзерләү өчен халык күптән әзерләнә башлады. Ун көнгә сузылган бәйрәм яллары да бар бит әле. Бәйрәм көне һәм озакка сузылган яллар кеше организмы, бигрәк тә ашказаны өчен – зур сынау. Нәкъ менә бәйрәмнәрдән соң ашказаны-эчәк тракты, йөрәк-кан тамырлары авырулары борчу куркынычы арта, диләр табиблар. Бу чорда ничек тукланырга? Яңа ел төнендә нәрсә ашарга? Киңәшләребез сезгә ярдәм итәр, дип ышанабыз.

Шикәр диабеты, бавыр, ашказаны-эчәк тракты авырулары булган, диетадагы кешеләргә Яңа ел төнендә дә искәрмә ясарга ярамый. Бәйрәм дип артык күп ашау күңелсез нәтиҗәләргә китерергә мөмкин. Ашказаны асты бизе ялкынсыну, моңа кадәр булган авыруларның көчәеп китүе бар.

Кунаклар каршы алучы хуҗабикә, табын әзерләп йөреп, гадәттә кич кенә ашый. Яңа ел төнендә кайбер гаиләләр, сәгать телләре уникене сукмыйча, өстәл янына утырмый. Бу да организм өчен зыянлы. Шуңа 31 декабрьдә иртәнге ашны ашарга, көн дәвамында җиңелчә тукланырга киңәш ителә. Табынга утырыр алдыннан 40 минут кала бер стакан су эчеп, җиңелчә салат ашау файдалы.

Табындагы ысланган, майлы ризыкларга күз төшермичә, күбрәк яшелчә һәм җиләк-җимешләр ашарга тырышыгыз.

Салатларны майонез, май кушып әзерләмәгез. Җиңелчә салатларга, йогурт болгатылган җиләк-җимеш салатларына өстенлек бирегез.

Майлы пилмән урынына парда пешерелгән тавык түше белән томалап пешерелгән кәбестә куллансагыз, бу – сәламәтлегегезне кайгырту юнәлешендә зур адым булыр.

Казны да парда пешерсәгез файдалырак.

Сәламәт һәм озын гомерле булыр өчен, чикләвек ашагыз. Табында берничә төрле чикләвек булу үзенчәлекле булачак һәм киләсе ел хуҗасы – елан күңеленә хуш киләчәк. Гарнирлардан дөге яисә бәрәңге сайласагыз яхшырак. Яшелчәләр белән әзерләнгән дөге тәмле дә, туклыклы һәм затлы да. Әлеге ризыклар сәламәтлек өчен файдалы.

Майлы һәм татлы торт урынына аз калорияле торт яисә печенье ашагыз.

Җиләк-җимешләр турында да онытмагыз. 2025 елны каршы алганда, Яңа ел табынына табигый гармонияне ассызыклаучы яшел төсмерле җиләк-җимешләр кую кирәк, диләр. Мәсәлән, яшел алма, виноград, груша, киви, фейхоа. Алар табынны бизи һәм киләсе ел хуҗасына да ошаячак. Җиләк-җимешләр күңел күтәренкелеге өсти.

Төрле ризыклар ашаганнан соң газлы суга үрелмәгез. Морс һәм үлән чәйләре куллансагыз яхшырак булыр.

“Яңа ел төнендә каз, пилмән һәм майонезлы “Оливье” салатын ашамагач, нинди бәйрәм инде ул?!” – диючеләр дә булыр. Табиблар ашаудан тыймый, сәламәтлек өчен ничек яхшырак булачагын гына искәртә. Чама хисен белергә һәм туклануны төрле уеннар, саф һавада йөрү белән аралаштырырга киңәш итәбез.

Фото – Татар-информ архивыннан