Спиртлы эчемлек кулланып - руль артына

Районда спиртлы эчемлекләр кулланган килеш машина йөртүчеләр турында хәбәр итү өчен Телеграм-канал эшли. Төркем “Муслюмово пьяный водитель” дип атала. Алкоголь кулланган шоферлар турында мәгълүмат аноним рәвештә кабул ителә.
Бәйрәм ялларында әлеге канал аша ике машина йөртүче тоткарланды. Егетләр машина йөртү таныклыгыннан мәхрүм ителгән килеш кабаттан руль артына утырган, өстәвенә алкоголь кулланганнар. “Ике машина йөртүче дә 5-10 тәүлеккә сак астына алынды. Райондашларыбызга карата җинаять эше кузгатылачак. Ел башыннан спиртлы эчемлекләр эчеп, руль артына утырган 32 шофер тоткарланды, шуларның икесе – хатын-кызлар” ,– ди районның ДАИ җитәкчесе Феликс Мәгъданов.

Фото - "Татар- информ" архивыннан