Бу көнне

28 март

 Өлгерләр

М.Горький исемендәге колхоз механизаторлары Гариф Әхмәтҗанов һәм комплекслы бригада бригадиры Газинур Рәхмәев иптәшләр укуда да эштә дә зур тырышлык күрсәтәләр. Алар икесе дә авыл яшьләренең кичке урта мәктәбендә 4-5 билгеләренә генә укыйлар.  Р.Камалов.

Эшлекле җыелыш
Күбәк урта мәктәбе башлангыч комсомол җыелышы узды. Җыелышта комсомол оешмасы секретаре Низамовның доклады тыңланды. Чыгарылыш класс укучыларының профессия сайлау буенча тутырылган анкеталарына анализ ясалды. 

Л. Садриева.

31 март 
Тиздән төгәлләнә
“Мөслим” совхозы эшчеләре чәчүлек орлыкларны агулауга бердәм керештеләр. Бу эшкә махсус бригада беркетелде. Элемтә бүлекчәсендә 3000 центнер орлык агуланып бетте инде. Хәзер бригада Михайловка бүлекчәсендә эшли.
В. Хәмидуллин 
Аның өлеше зур
“Трудовик” совхозы савымчылары  сыерлардан сөт савып алуны көннән-көн арттыра барып, дәүләткә сөт сатуның беренче квартал планын 16 мартка 104 процентка арттырып үтәделәр. Яулаган бу уңышта совхозның Тойгельде бүлекчәсе савымчысы Фәния Ганиеваның да өлеше зур.