Татарстанда кабат дизель ягулыгы һәм бензин бәясе артты

Татарстанда 4-11 сентябрьдә дизель ягулыгына һәм бензинның барлык маркаларына бәяләр шактый артты.

Дизель ягулыгының бәясе 1,78% ка (1 сум һәм 3 тиен) артып, литры 58,77 сумга җиткән.

АИ-92 бензин бәясе 0,75% ка (37 тиен) артып, литры 49,51 сумга җиткән.

АИ-98 бензинына бәя 0,69% ка (45 тиен) артып, литры 65,13 сумга җиткән.

АИ-95 бензинына бәя бик аз үзгәрә, 0,47% ка (25 тиен) арта һәм литрына 53,63 сумга җитә.

Россиядә бензин бәяләре июль аеннан яңадан күтәрелде, ә трейдерлар кайбер төбәкләрдә бензин сату проблемалары турында хәбәр итте.

Россия авыл хуҗалыгы министры Дмитрий Патрушев аграрийлар ягулык белән тәэмин ителергә тиеш һәм бу уңышка йогынты ясамаска тиеш дип белдерде.

Шул ук вакытта Россия Президенты Владимир Путин ягулык бәяләре белән бәйле вәзгыятьне күзәтә һәм чиновниклар белән очрашулар үткәрә.

Фото - Татар-информ архивыннан.