Үлән һәм чүп-чар яндыру тыела

Яз җитеп, җир өсте кипшерә башлау белән халык, бигрәк тә җир хуҗалары коры үлән яндыра башлый. Янгын куркынычсызлыгы таләпләре буенча үлән һәм чүп-чар яндыру катгый тыела. Авыл хуҗалыгы белгечләре коры үләнне яндыру туфракның гумус катламын боза дип белдерә. “Басу-кырларда коры үлән яндыру зур янгыннар чыгуга сәбәп булып тора. Коры үлән яндырган өчен гражданнарга – 4 мең сумга кадәр, вазыйфадагы затларга – 15 мең, юридик затларга 250 мең сумга кадәр штраф яный. Басу-кырларда коры үлән яндыручыларны күрсәгез, тиз арада янгын сүндерүчеләргә хәбәр итегез”, – ди Мөслим һәм Сарман районнары буенча янгын күзәтчелеге бүлге өлкән инспекторы Ренат Идиятуллин.