Слайдер

Командалар “визит карточкасы” биреме буенча үзләрен һәм проектлар тәкъдим иттеләр. Сыйныфларның эшчәнлеге белән махсус күргәзмәдә дә танышырга мөмкин иде. Бәйгедә Минзәлә районы 3 санлы урта мәктәбенең 5а сыйныфы җиңү яулады. Мөслим гимназиясенең 7б сыйныф укучылары – икенче, Актаныш 1 санлы урта мәктәбенең 5 сыйныфы өченче урынга лаек булды. Мөслим лицее – “Туган як елъязмасы” номинациясендә, Сарман районының Җәлил гимназиясе – “Халыклар дуслыгы” һәм Тукай районының Новотроицк урта мәктәбе “Иҗади алым” номинациясендә бүләкләнде.

Бәйрәм тантанасы районыбыз үзешчәннәренең һәм төрле бию коллективларының матур чыгышлары белән үрелеп барды.

Татар халкында “чебешләрне көз көне саныйлар” дигән әйтем бар. Районыбызның авыл хуҗалыгы хезмәтчәннәре дә ел дәвамында башкарылган эшкә нәтиҗә ясадылар. Күрсәткечләр начар түгел. Авыл хуҗалыгы алдынгыларын тәбрикләү тантанасында да әлеге тармакта эшләүчеләргә рәхмәт сүзләре яңгырады, дан җырланды. Зифа Басыйрова исемендәге район мәдәният йортында узган тантаналы чарага авыл хуҗалыгының төрле тармакларында хезмәт куючы, югары хезмәт күрсәткечләренә ирешкән егет-кызлар – алдынгылар җыелды. Тантанада тармакның хезмәт ветераннары, авыл җирлекләре башлыклары, оешма-предприятие җитәкчеләре һәм аграр көллият укучылары да катнашты. Тантаналы чара авыл кешесенә, авыл хезмәтчәннәренә дан җырлаган театральләштерелгән күренеш белән башланды. Район башлыгы Рамил Муллин авыл хуҗалыгы хезмәтчәннәренә рәхмәтен һәм тәбрикләвен җиткерде.

Быел район мәктәпләренә 1 сыйныфка 264 бала килде. 11 класста 105 укучы белем алачак. 10 класста укучылар саны – 70ләп бала. Район үзәгендәге мәктәпләрдә узган Белем бәйрәмнәрендә район башлыгы Рамил Муллин, ТР Урман хуҗалыгы министры урынбасары Рәис Гомәров һәм мәгариф идарәсе җитәкчесе Рафаэль Демидов катнашты. Кунаклар, укучыларны тәбрикләп, уңышлар, укытучыларга сабырлык теләде. Бәйрәмдә 1 сыйныфлар сәләтләрен күрсәтте, 11ләр нәниләрне мәктәп тормышы белән таныштырды.

28 июль көнне "Нурлыгаян" паркында Яшьләр көне узды. Бәйрәмнең махсус кунагы – танылган җырчы Ришат Төхвәтуллин һәм аның иҗат төркеме иде. Чарада төрле өлкәләрдә уңышка ирешкән, тырыш хезмәтләре белән хөрмәт яулаган яшьләр,күпбалалы гаиләләр район башлыгының Рәхмәт хатлары һәм сертификат белән бүләкләнде. Динар Нуретдинов фотолары.

Россия Хәрби диңгез флоты 321 еллык тарихы бар. Июльнең соңгы якшәмбесендә Россиядә Хәрби диңгез флоты көне билгеләнә. Бәйрәмгә нигез 2006 елда ук салынса да, безнең җирлектә мондый чара әле икенче тапкыр гына үткәрелде. Кичә район үзәгендә флотта хезмәт үткән ир-егетләр җыелды. Иҗтимагый совет рәисе Рушат Солтанов моряк исемен горур йөртүчеләрне район Советы, Башкарма комитеты исеменнән бәйрәмнәре белән тәбрикләде. Хәрби диңгез флотында хезмәт үтүчеләр хәрәкәте үсеп килүче буынга патриотик тәрбия бирүдә мөһим роль уйный, дип билгеләп үтте ул. Безнең моряклар да, берләшүләрен раслап, оешманың җитәкчесен сайладылар. Ул – Ринат Исламов. Бәйрәм итүчеләрне район үзешчәннәре тәбрикләве дә бик урынлы яңгырады. Мемориал комплекста хәрби хезмәт елларында вафат булганнар истәлегенә бер минутлык тынлык игълан ителде. Аннан соң диңгезчеләр монументка тәкыялар, кызыл канәферләр салды. Динар Нуретдинов фотолары.

Традицион велойөреш хәрәкәт итүнең бу чарасын үз итүчеләрне берләштерде. Бу көнне баш табиб та, мәктәп директоры, укытучылар, башка хезмәткәрләр, пенсионерлар, өлкәннәр һәм яңа тәпи баскан сабыйлар да спортчыга әйләнде. Велоузышка старт бирелгәнче, барлык катнашучылар "Яшел Фитнес" спорт проекты кысаларында зарядка ясады. Велосипедчылар, Мөслим урамын, “Кояшлы Ык” паркын урап, финишка якынлашты. Чараның финалы номинацияләр буенча бүләкләү булды. Иң яшь велосипедчы – Газизә Мирзаянова (2,4 яшь); иң өлкәне – Зәйтүнә Минһаҗева ; иң җитезе- Кирил Чан.Фахразиевлар “велогаилә” гаилә буларак танылды. Иң оригиналь велосипед Әмин Сираҗетдиновта. Раушан Нигьматуллин фотолары.

“Кояшлы Ык” ял зонасында матур, истәлекле бәйрәмнәр еш үткәрелә. Кичә шундый бәйрәмнәрнең берсе – 11 сыйныфны һәм аграр көллиятне тәмамлаучылар өчен чыгарылыш кичәсе узды. Анда урта мәктәпне тәмамлау турында кулларына аттестат алучы 70 укучы һәм аграр көллиятне кызыл дипломга тәмамлаучы 6 укучы катнашты. Чараны ачып, район мәгариф идарәсе җитәкчесе Рафаэль Демидов тәбрикләүләрен җиткерде, укучыларга һәм әти-әниләргә рәхмәт сүзләрен әйтте. Район башлыгы Рамил Муллин укучыларга киләчәктә дә тырыш, алдынгы булуларын һәм һәрвакыт “мөслимлеләр” дигән исемне горур йөртүләрен теләде. Р. Муллин һәм Р. Демидов урта мәктәпне медальгә тәмамлаучы 20 укучыга – медальлләр һәм аграр көллият укучыларына дипломнар тапшырдылар. Район мәдәният бүлеге җитәкчесе Ирек Салихҗанов мәдәният чараларында актив катнашкан чыгарылыш сыйныф укучыларына район башлыгының һәм мәдәният бүлегенең Рәхмәт хатларын һәм кыйммәтле пакетлар тапшырды. Бәйрәм чарасы талантлы җырчы укучы һәм укытучыларның җырлары белән үрелеп барды. Чыгарылыш сыйныф укучылары үзләре дә флешмоб әзерләгән иде. Бәйрәмнең кульминацион өлешен исә татар эстрадасының иң креатив җырчысы Мөнир Рахмаев бүләк итте. Ул укучылар белән җырлады, биеде, тәбрикләү сүзләрен җиткерде. Чараны караучы әти-әниләр, укытучылар коллективлары да бәйрәмнең олы кунаклары булдылар.

Район башлыгы Рамил Муллин Рухи-әхлакый үсеш елы кысаларында “XXI гасырның күркәм гаиләсе” муниципаль бәйге игълан иткән иде. Мөслим гимназиясе базасында бәйгенең финалы узды. Чарада җиде гаилә катнашты. Алар – Мөслимнән Гөлназ һәм Илдар Хәйруллиннар, Ландыш һәм Марсель Әһлиевләр, Роза һәм Ирек Зиннуровлар, Олы Чакмактан Миңнур һәм Мөнәвир Нәгыймовлар, Тат. Бүләрдән Алсу һәм Илдар Вәҗетдиновлар, Күбәктән Ильфира һәм Ирек Камаловлар, Баектан Индира һәм Ирек Хәмәдишиннар. Гаиләләр бәйрәмгә балалары һәм якыннары белән килгән иде. Бәйгедә катнашучылар тамашачыларга үз гаиләләре турында презентация һәм видеоязмалар тәкъдим иттеләр. Һәр гаилә музыкаль күчтәнәч тә алып килгән иде. Район мәгариф идарәсе җитәкчесе Рафаэль Демидов бәйгедә ктанашкан һәр гаиләгә дипломнар тапшырды. Бәйгенең җиңүчеләре август аенда узачак укытучылар конференциясендә игълан ителәчәк.

2 июнь көнне Мөслимебезнең "Кояшлы Ык" ял итү паркында бөтендөнья "Лэнд-Арт" фестивале старт алып, 8 июньгә кадәр дәвам итте. Бу вакыт эчендә дөньяның төрле почмакларыннан һәм күрше тирә илләрдән килгән иң көчле 15 команда 6 көн дәвамында Лэнд-Арт сәнгатенә үз идеяләрен тәкъдим итте. 8 июнь көнне "Кояшлы Ык" ял зонасында фестивальнең нәтиҗәләре игълан ителде. Анда район башлыгы Рамил Муллин, ТР яшьләр белән эшләү һәм спорт министры урынбасары Ренат Садыйков, “Созвездие – Йолдызлык” сәләтле балаларга һәм яшьләргә ярдәм итү республика үзәге директоры Дмитрий Туманов, “Лэнд-сервис” җәмгыяте генераль директоры Людмила Костычева катнашты.

Районда дүртенче ел рәттән сәләтле балаларның “Мөслим йолдызлары” фестивале үтте. Чарада 2018-2019нчы уку елы дәвамында төрле фәнни конференцияләрдә, социаль проектларда, спорт ярышларында, сәнгать бәйгеләрендә, фән олимпиадаларында җиңү яулаган укучылар бүләкләнде. “Мөслим йолдызы” титулына ия булган укучыларны, Мөслим урта мәктәбенең “Ел укучысы-2019” исеменә лаек булган укучысы Зилә Биккининаны район башлыгы Рамил Муллин тәбрикләде. Тантанада фән олимпиадалары җиңүчеләре һәм призерларының укытучылары, мәктәп һәм мөгаллимнәр белән тыгыз элемтәдә булган ата-аналар, гаиләләр дә хөрмәтләнде. Фестиваль сәнгать бәйгеләрендә җиңү яулаган коллективлар һәм укучыларның чыгышы белән үрелеп барды.

Бөек Җиңүнең 74 еллыгына багышланган бәйрәм чарасы сугышчан һәм хезмәт даны мемориаль комплексында чәчәкләр һәм веноклар салудан башланды. Мөслимнең үзәк урамнарыннан район үзәгендәге хезмәт, җәмәгатъ оешмалары, мәгариф учреждениеләре коллективлары Җиңү бәйрәменә багышланган демонстрациядә катнашты. “Үлемсез полк” акциясе – 9 май бәйрәменә күркәм төсмер өстәүче чараларның берсенә әверелде. Бу көнне халык сугышта катнашкан, яу кырында ятып калган туганнарының фотосурәтләрен тотып урамга чыга. Россия Федерациясенең барлык төбәкләрендә үткәрелүче әлеге акциягә мөслимлеләр быел да бик теләп кушылды. Бәйрәм чарасы театральләштерелгән тамаша белән дәвам итте. Сугыш чоры вакыйгаларын, фронтта һәм тылда совет халкы күрсәткән батырлыкларны гәүдәләндергәнкүренеш һәркемнең күңелен кузгатты, күзләргә яшь китерде. Район үзешчәннәре көче белән әзерләнгән концерт программасы сугыш чоры җырлары һәм дәртле биюләр белән үрелеп барды.

6 май көнне Зифа Басыйрова исемендәге район мәдәният йортында “Өмет” инвалидлар төркеме, Сарман мәдәният сарае артистлары, Мөслим районының Иске Карамалы авылы үзешчәннәре, Әлмәт шәһәре үзншчәннәре катнашында хәйрия концерты булды. Концерттан кергән акча Мөслимнән Регина Аптеевага һәм Олы Чакмак авылыннан 12 яшьлек Нәфис Гариповка дәвалану өчен бирелде. Концертны яакташыбыз – Яңа Карамалы авылы кызы Ләйлә Кәрамова алып барды.

Сәнгать белән кызыксынучы балаларга сәләтләрен үстерү өчен дә, үзләрен сынап карау, күрсәтү өчен дә мөмкинлекләр җитәрлек. Нинди генә бәйгеләр юк?! Узган атнада шундый конкурсларның берсе – “Без бергә!” халык иҗаты республика балалар сәнгать фестиваленең муниципаль туры үтте. Конкурсның максаты балаларның иҗади сәләтләрен үстерү генә түгел, ә халык авыз иҗатына, тарихи-мәдәни мирасыбызга хөрмәт тәрбияләү, балаларның бу өлкәдә белемнәрен арттыру иде. Фестивальнең номинацияләре дә күптөрле: вокал (соло), халык ансамбльләре, хореография, инструменталь ансамбль, сәнгатьле уку, иҗади гаилә һәм мода театры. Җыр-биюләр дә, сәнгатьле сөйләм дә, гомумән, һәр номинация халык авыз иҗаты белән бәйле булырга тиеш. Мода театры, мәсәлән, этнографик костюм тәкъдим итәргә, биючеләр халык биюен әзерләргә тиеш иде.

Бөтендөнья татар конгрессы Башкарма комитеты “Россиянең татар авыллары” Бөтенроссия иҗтимагый оешмасы белән берлектә VIII Бөтенроссия татар авыллары эшмәкәрләре җыены кысаларында Мөслимдә Татарстан Республикасыннан гына түгел, РФ ның 40 регионыннан килгән 800 гә якын делегат кунак булды.