Суд карары чыкты

15 сентябрь көнне көнне мировой судья спиртлы эчемлекләр кулланган хәлдә руль артына утырган Харисов эшен карады. Ул, өлешчә булса да, гаебен таныды.

– Менә сезнең проблемаларыгыз бармы? Минеке дә бар! Кем эчми инде хәзер?! Әйе, эчкән идем, яшермим. Тик мин үземне гаепле, дип уйламыйм. Бөтен кеше дә эчә! Ә эләктерделәр нәкъ менә мине! Бер стакан сыра гына эчкән идем. Аракы эчкәнем юк! – диде ул, күзен дә йоммыйча.
Райондашыбызның канында спиртның нормадан ике тапкыр артык булуы ачыкланган. Гаепләнүче, видеоязмада үзенең көч-хәл басып торуын күреп, оялды бугай, гаебен танырга мәҗбүр булды.

– Хәмер кулланып тоткарланучыларның күбесе: “Бер бокал сыра гына эчтем”, – дип акланырга ярата. Тик, алкотестер нәтиҗәләреннән күренгәнчә, канда алкоголь күләменең нормадан өч мәртәбә артык булуы өчен сыраны заводына барып чөмерү кирәктер, мөгаен, – ди районның ДАИ җитәкчесе Феликс Мәгъданов.

Административ җинаять кылганы өчен Харисовка суд тарафыннан 30 мең сум күләмендә штраф билгеләнде һәм 1 ел да 6 айга транспорт белән идарә итү хокукыннан мәхрүм итү турында карар чыгарылды.

Лилия Шәймиева фотосы.