МХОдә катнашучыларга гуманитар ярдәм әзерләү дәвам итә

"Җәмигъ" мәчетендә махсус хәрби операциядә катнашучыларга җибәрү өчен гуманитар ярдәм әзерләү дәвам итә. Мөслимәләр җыелышып, догалар кылып, салаватлар әйтеп, матур теләкләр теләп "Коры душ" , озак яна торган шырпылар ясыйлар. Дисбеләр, догалыклар, өс – баш, аяк киемнәре, кулдан кискән токмач, киптерелгән ипи, көндәлек кирәк – ярак, консервлар, хуш исле чәйләр, тәм - томнар әзерлиләр. Госпиталь өчен урын – җир әйберләре, эчке киемнәр, салфеткалар, тозлы бәйләвечләр, медицина кирәк - яраклары туплана. Иганәчеләр ярдәме белән парафин, сөлгеләр, җылы киемнәр заказ биреп кайтарылды, шулай ук киң күңелле райондашларыбыз егетләргә кирәк булырдай бар нәрсәне китерәләр. Авыл мәхәлләләре активлык күрсәтә, барысы бер йодрык булып ихтыяҗ булган әйберләрне барлап алып киләләр. Әзер тартмаларның бер өлеше Диния нәзарәте аша юлланса, бер өлеше Мөслимнән кузгалачак. Алдагы гуманитар ярдәмгә 60 дисбе, 476 “коры душ”, 780 данә озак яна торган шырпы әзерләнгән. 

Фото – Мөслим мөхтәсибәтеннән