Зур тормышка тәүге аваз салып, Яңгырады көмеш кыңгырау

Ел саен кабатланып торса да, кеше тормышында бер генә була торган бәйрәмнәр бар. Соңгы кыңгырау – шуларның берсе. Күңелле дә, бераз моңсу да ул. Күңелле – ел буена тырышып белем алуның нәтиҗәсен күрер чак җиткән. Моңсу – Белем бәйрәме белән әле генә башланган кебек булган мәктәп еллары инде артта калган. 

Чыгарылыш 9 һәм 11 сыйныф укучыларының гына түгел, яшь аралаш елмаючы әти-әниләрнең дә күңел кыллары бу көнне каршылыклы хисләр дулкынында тибрәлә.

Мәктәпләрдә Соңгы кыңгырау бәйрәме ел да яңа төсмерләр белән баеп, зурлап үткәрелә. Быел районыбыз мәктәпләрендә 11 сыйныфны – 77, 9 сыйныфны 219 укучы тәмамлый. Соңгы биш елда бу – район өчен рекордлы сан. 

Район башлыгы урынбасары Азат Әхмәтҗанов, район башлыгы Альберт Хуҗинның чыгарылыш сыйныф укучыларына булган теләкләрен җиткереп:

– Мәктәпләрдә сезгә бик матур тәрбия бирелгән. Ул сезнең ихлас чыгышларыгызда да яхшы күренә. Сезнең шулай акыллы, сабыр, Мөслимне гомер буе ярата торган егет-кызлар булуыгызны телибез. Дәүләт имтиханнарын куанычлы нәтиҗәләр белән тапшырып, үзегез теләгән уку йортларына керергә насыйп булсын сезгә, – диде.

Рәмилә Сәләмова фотолары

Фото: спорт мәктәбе архивы

Тулырак «Авыл утлары» газетасының 2025 ел өчен 30 май саныннан укыгыз.