Мөслим лицеенда әти-әниләр бердәм дәүләт имтиханы форматында имтихан бирде

Хәзер балалар гына түгел, әти-әниләр дә имтихан тапшыра. Шул рәвешле әти-әниләр балаларның сынау вакытында ниләр кичерүен аңларга тырышалар. Акциянең төп максаты — имтиханнар чорында чыгарылыш сыйныф укучыларының әти-әниләрен балаларына психологик ярдәм күрсәтә алуын тәэмин итү һәм аларны имтиханнар бирү барышы белән якыннан таныштыру.

Әти-әниләр бердәм дәүләт имтиханы форматында математикадан имтихан тотты. Сынауны 50дән артык райондашыбыз тапшырды. Алар арасында чыгарылыш сыйныф  укучыларының әти-әниләре һәм җәмәгать эшлеклеләре дә бар иде. Дүрт аудиториядә узган сынауда алар тест формасындагы биремнәрне үтәде.

БДИ һәм 9 сыйныфлар өчен төп дәүләт имтиханнары, гадәттәгечә, лицей базасында уза. Укучылар рус теле һәм математикадан гына дәүләт имтиханын тапшыра. Моннан тыш үзләре теләгән фәннән контроль эш эшли.

Лилия Шәймиева фотолары.