Онытырга хакыбыз юк!

Баек авылында яшәүче Салих Госманов сугыш­ка 1943 елның январенда китә. Мөслимнән туксан кешене Ерак Көнчыгышка озаталар. Майга кадәр дәвам иткән өйрәнүләрдән соң Салих Госманов Кы­рым, Керчь өчен сугышлар­да катнаша. 1944нче елның җәендә, һөҗүмнәрнең берсендә Салих ага, кон­тузия алып, госпитальгә эләгә. Дәваланганнан соң туган ягына кайта. 1947 елда гаилә корып, Нурдидә апа белән озак еллар матур гомер итәләр. Бүген вете­ран ялгызы гомер кичерә.

Районыбызның бердәнбер сугыш ветераны Салих Гос­мановны район башлыгы өенә барып котлады. Альберт Хуҗин ветеранга Россия Фе­дерациясе Президенты Вла­димир Путинның котлавын җиткерде, күчтәнәчләр һәм түбәтәй бүләк итте.

Район башлыгы бу көнне Баек авыл җирлегендә яшәүче сугыш чоры балалары – хезмәт ветераннары белән дә очрашты. Дусайдан Сәрмәдия Мирзаянова озак еллар мәдәният өлкәсендә хезмәт куйган. Башта – китапханәче, аннан 33 ел Дусай клу­бы мөдире булып эшләгән. Сәрмәдия апа – Татарстанның һәм Россиянең атказанган мәдәният хезмәткәре.

Нәдип Ракыйповка шушы көннәрдә 90 яшь тулды. Ул да РФ Президентының кот­лау хатын һәм күчтәнәчләр кабул итте. Гомере буе кол­хозда механизатор булып эшләгән Нәдип абый сүзгә са­ран, әмма эшкә батыр. “Бела­русь” тракторы белән Казах­станга кадәр барып җиткән ул. “Салам кипләргә бардык”, – ди ул, яшьлеген искә алып. Нәдип абый белән тормыш иптәше Сәхия апаның гаилә коруларына быел 65 ел тула. Өлкәннәр озак еллар тигез тату яшәү сере белән дә урта­клашты: бер-береңне хөрмәт итәргә, юл бирә белергә кирәк!

Сугыш ачысын татыган, сугыш авырлыгын күргән әби-бабайлар – барысы да бер теләктә: ил-көннәр ты­ныч, дөньялар имин булсын! Сугыш афәтен беркемгә дә күрергә язмасын!

Шунысын да әйтергә кирәк: тыл ветераннарына, республика хөкүмәтеннән тыш, игелекле эшмәкәр Илгиз Исламов һәм “Август-Мөслим” җәмгыяте җитәкчелеге дә азык-төлек пакетла­ры – күчтәнәчләр әзерләде. Нәтиҗәдә җирлегебездә яшәүче 190 тыл ветера­ны да бәйрәм бүләкләре ка­бул итте. Мәктәп укучыла­ры өлкәннәргә открыткалар да таратты. Өлкәннәр киң күңелле эшмәкәрләргә һәм мәктәп коллективларына рәхмәтләрен җиткерде.

“Август-Мөслим” җәмгыятенең өлкәннәргә та­гын бер бүләге бар. Компания җитәкчелеге Бөек Җиңүнең 77 еллыгы уңаеннан бертөркем (58 кеше!) тыл ветераннарын һәм сугыш ветераннарының тол кал­ган хатыннарын 2022нче елның икенче яртыеллы­гы өчен “Авыл утлары” га­зетасына подписка белән бүләкләде. Августлыларның өлкәннәрне беренче генә тапкыр сөендерүе түгел – җәмгыять яртыеллык саен җирлегебездә яшәүче хезмәт ветераннарын, социаль яклауга мохтаҗларны рай­он газетасына яздыра. Әлеге игелекле гамәлегез өчен рәхмәтебезне җиткерәбез. Кылган игелегегез үзегезгә меңе белән кайтсын!

Римма Афзалова.

Айзилә Мөхәммәтҗанова фотосы.