Кемерово фаҗигасе кабатланмасын өчен

Саклык чараларын тагын бер кат тикшерү һәм ныгыту максатында Мөслим районы үзәк хастаханәсендә янгын куркынычсызлыгы кагыйдәләре буенча планнан тыш инструктаж үткәрелде. Гәдәттән тыш хәлләр буенча Мөслим районы бүлеге җитәкчесе урынбасары Рушан Фәрхетдинов янгынга каршы нинди чаралар күрергә, нинди эшләр башкарырга кирәклеге хакында сөйләде. Бүлек хезмәткәре Ринат Идиатуллин янгын сүндергечтән ничек кулланырга кирәклеген аңлатты. Укуларда барлыгы 80 хезмәткәр катнашты.