Эш бар ул!..

Бүгенге көндә 35 кеше – 19 ир-ат һәм 16 хатын-кыз районның хезмәт һәм мәшгульлек үзәгендә эшсез була­рак исәптә тора. Шуларның тугызы – югары, 13е – урта белемле, 13е урта- һөнәри белемгә ия.

– Исәптә торучыларның берсе – сәламәтлеге чикле райондашыбыз, унбере – пенсия алды яшендә. Унбиш кешенең балигъ булмаган балалары бар, өчесе – күпбалалы әти-әниләр. Исәптә торучы эшсез кешенең иң яшенә – 23, иң өлкәненә – 61 яшь, – ди районның хезмәт һәм мәшгульлек үзәге җитәкчесе Мөнирә Идиятуллина.

Хезмәт һәм мәшгульлек үзәгендә исәптә торучыларга ай саен 1500 сум­нан 12792 сумга кадәр пособие түләнә. Пособиенең күләме эш стажына һәм соңгы эш урынындагы еллык хезмәт ха­кына бәйле.

Ел башыннан, эш эзләп, үзәккә 69 кеше мөрәҗәгать иткән, шуларның 42се эшкә урнашкан. Үзәктә исәптә то­ручылар арасында икътисадчы, сату­чы, кассир, пешекче кебек һөнәр ияләре дә шактый. Мөнирә Идиятуллина хәбәр итүенчә, эшсезләр күпчелек террито­риаль сәбәп белән теркәлә, ягъни алар­га вахта ысулы кулланылмый торган эш кирәк. Югары хезмәт хакы таләп итүчеләр дә күп.

Эшсезләргә ярдәм итү максатын­нан вакансияләр ярминкәсе үткәрелә. Аның соңгысы 17 майда үтте. Район үзәк хастаханәсе, “Август-Мөслим” агрофир­масы, Мөслим сөт комбинаты вәкилләре бу көнне унҗиде эш урыны тәкъдим итте.

– Эш бирүчеләр катнашында үткәрелүче мондый ярминкәләрне эш эзләүче райондашларыбыз көтеп ала. Ярминкәдә унбиш кеше катнашты һәм алты кеше консультация алды. Өч кешегә эш урыннарына юллама бирелде, – ди Мөнирә Идиятуллина.

Вакансияләр ярминкәсендә эш тәкъдим итүчеләр хезмәт һәм ял шарт­лары, хезмәтхакы белән дә таныштыр­ды. Тәкъдим ителгән эш урыннарының хезмәт хаклары лаеклы иде. Тик эш эзләп килүчеләрнең генә күзләрендә очкын күренмәде.

– Җирлегебездәге оешма - предприятиеләр үзләрендәге вакансияләр турында ай саен безгә хәбәр итәргә бурычлы. Мәшгульлек сферасында коррупция юк. 2019 елның 1 апреленнән “Россиядә эш” мәгълүмат-аналитика порталы булды­рылды. Һәрбер граждан һәм эш бирүче бу портал аша мәшгульлек үзәгенә электрон рәвештә мөрәжәгать итә ала. Хезмәт һәм мәшгульлек үзәге аша узган ел 25 райондашыбыз түләүсез нигездә һөнәр үзләштерде (шуларның берсе – сәламәтлеге чикле кеше). Биш кеше – эретеп ябыштыручы, ун райондашыбыз визажист һөнәренә укыды. Биш кеше “1С-предприятие” программасы буен­ча эшләргә өйрәнде, биш ир-егет “Е” категориясе буенча машина йөртүче белгечлеген алды, – ди Мөнирә Иди­ятуллина.

Фото – Хезмәт һәм мәшгулельлек үзәге архивыннан.