Яр Чаллыда армрестлингтан республика турниры узды

25 апрельдә Яр Чаллы шәһәрендә армрестлинг буенча республика турниры узды. Ярышларга Татарстан Республикасыннан һәм Удмуртиядән якынча 300 катнашучы килде. Барысы 20 команда көч сынашты.

«Яшьлек» спорт мәктәбе командасы 2008–2014 елларда туган яшь кул көрәшчеләреннән торды һәм уңышлы чыгыш ясады.

Команданың тренеры Ларис Бариев хәбәр итүенчә, турнир нәтиҗәләре буенча Ралина Сираева алтын медаль яулады. Ислам Бариев көмеш медальгә лаек булды. Әминә Мансурова, Рөстәм Сираев һәм Аделя Хәлилова бронза медальләр белән бүләкләнделәр.

Иң яшь катнашучылар Динә Хафизова, Амелия Тазова, Зәйнәп Миргалимова, Рөстәм Фәттахов, Тимур Кашапов һәм Азамат Кәримов матур көрәш һәм җиңүгә ихтыяр көче күрсәттеләр.

Азат Шәймөхәммәтов һәм Мөнир Нәбиуллин, әзерлекләренең югары дәрәҗәсен күрсәтеп, 4 нче урынны алдылар.

Фото - "Яшьлек" спорт мәктәбеннән.