Мөслимдә Тукайга һәйкәл ачылды!

Быел тууына 140 ел тулган бөек шагыйребезнең һәйкәлен танылган рәссам, сынчы Халит Миңнегалиев иҗат иткән.

«Бу сквер гади урын түгел, ул – безнең рухи картабызның үзәге!» – дип билгеләп үтте район башлыгы Альберт Хуҗин.

Тантанада Габдулла Тукай исемендәге Дәүләт премиясенә лаек булган якташларыбыз – ТР Язучылар берлеге рәисе урынбасары Факил Сафин, халык язучысы Фоат Садриев чыгыш ясады. Укучыларның чыгышлары бәйрәмгә аерым ямь өстәде.

Чара ахырында һәйкәл тантаналы рәвештә ачылды, бөек шагыйрь истәлегенә чәчәкләр салынды.

Тукай – ул безнең телебез, рухыбыз, горурлыгыбыз! Аның иҗаты буыннарны берләштерә, туган телгә мәхәббәт тәрбияли.

Лилия Шәймиева репортажы.