Бакчадагы соңгы эшләр

Дымга туендырабыз

Кайбер бакчачылар, көзен бакчага яңгырлар да җитә, дип уйлап, ялгыша. Коры туфрак дымлы туфракка караганда тизрәк һәм тирәнрәк туңа. Көз буе кипкән тамыр системасына кышын физик кибү һәм туңу куркынычы яный. Дымга туендыру өчен, җиргә тамырлар тирәнлегенә җитәрлек итеп мул итеп су сибәргә кирәк. Бу эшне яфраклар күпләп коела башлаган чорда, һава температурасы 2-4 градус җылы булганда, ләкин җир тулысынча туңганчы башкарырга киңәш ителә. Туфрак ким дигәндә 60-80 сантметр тирәнлеккә кадәр дымлы булырга тиеш. Яшь агачлар өчен 5-6, җимеш бирүче өлкән агачлар өчен 10-15 чиләккә кадәр (якынча 100-150 литр) су кирәк булачак. Куакларга 3-5 чиләк су сибү шарт.

Агачларны саклыйбыз

Кабык – агач өчен саклану калканы. Көзен аны чистартырга һәм гөмбә спораларыннан, бөҗәк личинкаларыннан, кимерүчеләрдән һәм язгы кояш нурларыннан сакларга кирәк.

Яфраклар тулысынча коелгач, агачларның ябалдашларына һәм кәүсәләренә 3 процентлы бакыр купоросы эретмәсе яки Бордо сыекчасы сиптерергә кирәк. Бу анда яшеренгән авыру кузгатучыларны юк итәчәк.

Агач кәүсәләрен язын түгел, ә октябрь-ноябрьдә агартырга кирәк. Ак төс кабыкны февраль-марттагы кискен температура үзгәрешләреннән саклый, чөнки көндез кояш кабыкны җылыта, ә төнге салкыннар аны яра. Кәүсәне һәм ботакларның нигезләрен фунгицидлар өстәлгән махсус бакча буявы белән буягыз.

Тычканнар һәм куяннар кабыкны кимермәсен өчен, яшь агачларның кәүсәләрен махсус пластик челтәр яки, энәләрен түбәнгә каратып, ылыслы ботаклар) белән урагыз.

Теплицадан яки пасленчалар семьялыгына караучы үсемлекләр (помидор, борыч) яки кыяр үскән түтәлләрдән туфрак алмагыз. Иң яхшы вариант – урман агачлары астындагы (имән һәм талдан башка), ылыслы җир яки борчак, сарымсак, яшел тәмләткечләр үскән түтәлләрдән алынган туфрак.

Идеаль катнашма рецепты. Бакча яки урман туфрагын яхшы черегән компост яки черемә белән 1:1 нисбәтендә бутагыз. Йомшак булсын өчен, бераз юылган елга комы, вермикулит яки торф өстәгез. Әзер катнашманы ныклы пакетларга яки чиләкләргә салыгыз. Туфракны җылытылмый торган урында (балконда, сарайда яки теплицада сакларга кирәк. Кышын туңу – корткычларның йомыркаларын һәм гөмбә спораларын үтереп, файдалы микрофлораны саклап калучы иң табигый һәм нәтиҗәле дезинфекция ысулы.