Люция ападан – катлы пирог
Бүген күпләр өйдә пироглар пешерә. Катлы пирогларны кибетнеке кебек тәмле итеп пешерүче райондашларыбыз аз түгел. Шуларның берсе – Олы Чакмакта яшәүче Люция Хәбибуллина. Сезгә Люция ападан лимон-әфлисун пирогы рецептын тәкъдим итәбез.
Кирәкле ингредиентлар: камыр өчен бер кап акмай, ярты стакан сөт, бер аш калагы шикәр комы, бер чәй калагы коры чүпрә, бер чеметем тоз, 2-3 стакан он.
Эчлек өчен берәр лимон һәм әфлисун, бер стакан шикәр комы алабыз.
Эшләү тәртибе: өй температурасында эретелгән акмайны он белән кушып болгатабыз. Икенче савытта җылымса сөткә шикәр комы, чүпрә, тоз салып, 5 минут чамасы тотабыз. Аннары ике массаны бергә кушып, камыр басабыз һәм бер сәгатькә суыткычка куябыз. Камырны дүрт өлешкә бүлеп җәябез, берсен – пирогның аскы өлешен зуррак итәбез.
Хәзер эчлек әзерләргә дә вакыт җитте. Лимон белән әфлисунны төшләреннән арындырып, иттарткычтан чыгарабыз, шикәр комы өстәп болгатабыз һәм өч өлешкә бүләбез.
Пирогны, кат-кат итеп, камыр белән эчлекне чиратлаштырып ясыйбыз. Пирог өстенә берешәр аш кашыгы шикәр комы, акмай, онны болгатып сибәргә була. Уртасында, һава чыгарга дип, кечкенә генә тишек тә калдырабыз. Пирог духовкада 40 минут чамасы пешә. Әлеге пирогны пешерүнең бер сере бар – духовканы пирогны тыккач кына кабызырга кирәк.
Тәмле булсын!
Рубриканы Лилия Шәймиева алып бара.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев