Суд карары чыкты

– Беркайчан да алкогольле эчемлекләр кулланып руль артына утырганым юк. Хастаханәгә барып йөрисем килмәгәнгә генә ДАИ инспекторлары беркетмәсенә кул куйдым, – диде Галимов.
Галимовның ДАИ инспекторлары тәкъдим иткән алкотестерга өрүе, анда алкогольнең рөхсәт ителгән күләменнән өч тапкыр (!) артык булуы видеоязма буларак теркәлгән, югыйсә! Тик райондашыбызның үз сүзен бирәсе килмәде. Суд дәвамында: “Минем праваны алсагыз, эшсез калам бит,” – дип утырган ир-ат, спиртлы эчемлекләр кулланган хәлдә машина йөрткәндә, бу хакта уйламаган. 
– Райондашыбыз кичен тоткарланды. Качып котылырга теләсә дә, булдыра алмады. Күпләр кылган гамәлләренә үкенүен белдерә, Галимов исә судта да хаклы булуын расларга маташты, – ди районның ДАИ җитәкчесе Феликс Мәгъданов.
Җәмәгать суды алдына баскан райондашыбызга административ җинаять кылганы өчен суд тарафыннан 30 мең сум күләмендә штраф билгеләде һәм 1 ел да 6 айга транспорт белән идарә итү хокукыннан мәхрүм итү турында карар чыгарылды.

Фото "Татар-информ" архивыннан алынды