Бабаларыбызга хөрмәт белән

Парктагы өмәләр өчен иҗтимагый совет рәисе Рушат Солтанов җаваплы. Мемориаль комплекстагы чисталык һәм тәртип өчен ихластан сөенүче дә, чүп ташлаганга чын күңелдән  борчылучы да ул.

– “Сугышчан һәм хезмәт даны” мемориаль комплексы – Мөслимебездә изге урыннарның берсе, – ди Рушат Солтанов. – Биредә Бөек Ватан сугышында һәлак булган 5200дән артык райондашыбызның исеме мәңгеләштерелгән. Сугыштан кайтып вафат булган 4000нән артык райондашыбызның исемнәре дә шунда уеп язылган. Әфганчыларның, социалистик хезмәт геройларының бюстлары да шунда урын алган. Без балаларыбызга, оныкларыбызга мемориаль комплекска хөрмәт белән карарга өйрәтергә бурычлы, чөнки биредә безнең якты киләчәгебез, Ватаныбызның азатлыгы өчен һәлак булганнарның рухы яши.

Бүгенге көндә мемориаль комплекста тырмалау, чәчәк клумбаларын сыйфатлау эшләре бара.

– Чистарту эшләрен төгәлләп киләбез. Шушы көннәрдә территориядә брусчатка өлешен чистартуга керешәбез. Һәйкәлләргә, обелискларга һәм мемориаль диварларга косметик ремонт үткәреләчәк, – ди Рушат Солтанов.

Өмәләрдә район оешма-предприятиеләрендә эшләүчеләр катнаша. Һәр көнне 25-30 кеше килә. “Эшкә килгән һәркем киреләнмичә хезмәт куя. Барысы да бердәм булып, намуслы эшли”, – ди Р. Солтанов.
– Мемориаль комплекста оештырылучы өмәләрдә ел саен бик теләп катнашабыз, – ди район гражданлык хәле актларын теркәү бүлегенең баш белгече Диләрә Шакирова. – Хезмәтебез белән районыбызны, тирә-юнебезне төзекләндерүгә үз өлешебезне кертәбез. Мемориаль комплекс гади парк түгел, батыр якташларыбызны искә алу урыны. Кечкенә генә хезмәтебез белән аларның батырлыгы алдында баш иябез, алар турында балаларыбызга, оныкларыбызга сөйлибез. 

Әйе, мемориаль комплекс – патриотик хисләр тәрбияләү мәйданы. Андагы обелисклар саны да арта бара. Берничә ел элек  чикбуе гаскәрләрендә  хезмәт итүчеләр хөрмәтенә обелиск куелды. Быел мондый обелисклар саны бишкә җитәчәк.
– Чик буе гаскәрләрендә хезмәт иткән егетләр обелискны карап торалар. Бәйрәмнәрдә, мәрхүм хезмәттәшләрен искә алганда бирегә килеп чәчәкләр са-
лалар. Алардан үрнәк алып һава десанты гаскәрләрендә хезмәт итүчеләр дә обелиск ясата. Чечен сугышы ветераннары да обелиск урынын билгеләп, эш башладылар. Хәрби диңгез флотында хезмәт итүчеләр хөрмәтенә дә обелиск ясалачак. Хәтта кайчандыр Германиядә хезмәт итүчеләр дә СССРның көчен күрсәткән егетләр истәлегенә обелиск урнаштыру эшенә кереште. Биредә махсус хәрби операциядә катнашучы егетләр хөрмәтенә дә һәйкәл булыр, дип
өметләнәбез, – диде Р.Солтанов.
Обелисклар яшь буынны тәрбияләү, ватанпәрвәрлек хисләрен уяту максатында урнаштырыла. Балаларыбыз батыр якташларыбыздан үрнәк алсыннар, алар турында истәлекләрне горурлык белән сакласыннар.

Фәридә Гайнетдинова фотосы.