Ике авыл арасында басма

Һәр авылда диярлек елга-инеш аркылы үтеп юл кыскартып була торган урыннар була. Ташу китеп, ярсу сулар агып беткәч, бу урыннарда авылның игелекле кешеләре берләшеп басмалар кора торган булган. Мондый мөмкинлектән авыл халкы җәй буена рәхәтләнеп файдаланган. Басмадан үткән саен бу кешеләргә рәхмәт әйтү гадәте дә истәдер күпләрнең. Ә бит бу эшләр бушка эшләнгән. Ватылса, карап-төзәтеп тә торырга кирәк. Шундый игелекле кешеләр әле дә бар икән әле районыбызда. Михайловка белән Ташлыяр авылы арасында да шундый басма төзеп куйганнар.

"Басманы Ташлыярдан Марат Әгъләмов, Фәрит абыйлар, Михайловкадан Илһам Хафизов абый салды. Рәхмәт сезгә, игелекле җаннар!" - дип хәбәр итәләр михайловкалылар.

 Фәнисә Нигъмәтуллина фотосы