«Уйнагыз, гармуннар!»

23 сентбрь көнне "Курай" паркына районыбыз гармунчылары "Уйнагыз, гармуннар!" фестиваленә җыелды. Барысы 22 гармунчы сәхнәдә үз осталыгын күрсәтте, тамашачыларга моңлы көйләребезне бүләк итте. Араларында 4 яшь гармунчының да булуы чарага ямь өстәде. Авылларда гармунчыларыбыз күп. "Без кечкенә чакларда бөтен кичәләр гармун белән бара иде. Гармуннарны бетермәскә иде. Телебезне саклауга халык көйләре аша да үз өлешебезне кертә алабыз, дип, оештырабыз мондый чараны", - ди Фәнис Абдуллин. Гармунчыларны үзара очраштырырга, берләштерергә дә бер сәбәп бу. Гармун моңнарын тыңларга, кичке паркта ял итәргә авыл кешеләре дә килгән. Чара ахырында барлык гармунчыларга мәдәният бүлегенең рәхмәт хатлары, бүләкләр тапшырылды.

Гөлназ Җәлилова фотосы