Нәтиҗәле эш – киләчәккә ныклы нигез

 Комиссия составын­да авыл хуҗалыгы һәм азык-төлек идарәсе белгечләре, аксакал­лар эшләде. Белгечләр, район авыл хуҗалыгы формированиеләренең басуларында булып, үсентеләрнең тишелешен, торышын карады.

– Басу-кырларда йөргәндә чәчелми калган җирләрнең булмавына игътибар ит­тек. Төп җир участокла­ры эшкәртелеп чәчелә. Бу – зур хезмәт! Быел яз иген­че өчен уңай килде. Җирдә дым запасы җитәрлек күләмдә тупланды. Ходай табигать афәтләреннән са­класын, урып-җыю чо­рында яхшы һава торы­шы белән сөендерсен, куй­ган хезмәтнең нәтиҗәсен күреп, уңышны югалту­ларсыз җыеп алырга яз­сын. Соңгы 10-15 елда рай­онга бик күп куәтле техника кайтты, зур инвестицияләр кертелде. Хуҗалыклар яңа технологияләр куллана. Бу да көндәшлеккә сәләтле булыр­га мөмкинлек бирә, – ди озак еллар авыл хуҗалыгында эшләгән хезмәт ветераны Ильяс Зиннуров.

– Комиссия эшен “Исла­мов” хуҗалыгы басуларын­нан башлады. Хуҗалыкта технологияләрнең вакытын­да үтәлүен күреп сөендек. Тулаем алганда, бүгенге вәзгыятькә карамастан, районыбыздагы барлык хуҗалыклар да акчасын тап­каннар, кредит алганнардыр, бәлки, әмма зур күләмдә аш­лама туплаганнар. Язгы чәчү вакытында ашлама кулла­ну, үсентеләрне тукланды­ру файдага гына, – ди рай­он башлыгы Альберт Хуҗин.

Район башлыгы “Туган як” һәм “Август-Мөслим” аг­рофирмаларындагы тәҗрибә участокларының уңышка бер адым булып торуына басым ясады. Бәхәссез, фәнни алым эштә дә югары нәтиҗәләр бирә.

“Авзалов” һәм “Нурет­динов” крестьян-фер­мер хуҗалыклары да, үз мөмкинлекләреннән чыгып, ашлама һәм ягулык-майлау материаллары туплаган. Яңа техника да алганнар.

Комиссия районда чәчүлекләрнең торышы яхшы дип бәяләде. Барлык аграрийлар да технологик таләпләрне үтәп эшли. Иң мөһиме – кояш та вакытында чыксын, яңгыр да вакытында яусын. Тир түгеп хезмәт куй­ган механизаторларга лаеклы хезмәт хакы алырга язсын.

Лилия Шәймиева фотосы.