Җәй көне “пычрак куллар авыруы” баш күтәрә

Соңгы өч көндә район үзәк хастаханәсенең ашыгыч ярдәм бүлегенә 67 чакыру һәм мөрәҗәгать булган. Шуның 11е – көнкүрештәге тән җәрәхәтләре, 29ы – кан тамырлары авырулары белән. Косып һәм хәлсезләнеп, халык телендә “ротовирус” дип йөртелгән авыру белән 8 кеше мөрәҗәгать иткән. “Җәй көне “пычрак куллар авыруы” баш күтәрә. Моның сәбәбе – яшелчә, җиләк-җимешләрне юып ашамау, гигиена кагыйдәләрен үтәмәү. Эттән тешләнеп килгән бер райондашыбызга шулай ук беренче ярдәм күрсәтелде. Ике райондашыбыз – йөрәк өянәге белән, тагын ике өлкән кеше инсульт белән Әлмәт шәһәре хастаханәсенә озатылды. Җиде райондашыбыз дәвалану өчен хастаханәгә салынды”, – дип хәбәр итә бүлекнең өлкән фельдшеры Гөлфирә Сабирова.