“Киемгә икенче тормыш” акциясе бара

Мөслимдә “Киемгә икенче тормыш” акциясе бара. Акция тормыш – көнкүрештә авыр хәлдә калганнарга, мохтаҗ кешеләргә, күп балалы гаиләләргә ярдәм итү, хәйриячелек эшенә халыкның киң катламнарын җәлеп итүне максатыннан оештырыла.

Чара Татарстан Җөмһүрияте мөселманнарының Диния нәзарәте Мөслим мөхтәсибәте һәм “Ак калфак” Бөтендөнья татар хатын-кызлар иҗтимагый оешмасының Мөслим бүлеге инициативасы белән өченче ел рәттән елга ике тапкыр оештырыла.

Акцияне оештыручы Илүсә Исламова сүзе буенча, теләге булган кешеләр Мөслимдәге “Хәләл үзәк” бинасына яхшы сыйфаттагы яки бөтенләй киелмәгән өс, аяк киемнәре, уенчыклар, көндәлек өчен кирәк булган җиһазлар китерә алалар. Чара 21 майга кадәр дәвам итәчәк.

Рәмилә Сәләмова фотолары