Ислам мәчетенә таш салынды
“Яңарыш” микрорайонының Фоат Садриев урамында яңа мәчеткә нигез салынды. Тантаналы чарада Татарстан мөселманнарының Диния нәзарәте Аксакаллар шурасы рәисе Айрат хәзрәт Әюпов катнашты
– Мөслим районы мәчетләргә бай. Төркиядә 80 миллион кеше яши, анда 80 мең мәчет исәпләнә. Мөслимнең район үзәгендә 8 мең кеше яши һәм, Аллаһ рәхмәте белән, бишенче мәчеткә низез салына. Районда барлыгы 34 мәчет эшли, тагын дүртесе – төзелү стадиясендә. Төркияне дә уздырдыгыз, афәрин! Мәчетнең урыны бик уңышлы сайланган. Җирлек көннән-көн зурая. Аллаһ кушып, алга таба мөселман балалары өчен балалар бакчасы, дини татар мәктәбе, башка уңайлыклар да булыр. Изге эш дәвамлы булсын! – диде Айрат Әюпов.
Мәчетне райондашыбыз Илгиз Исламов төзетә. Төзелеш эшләрен алып баручы Казан оешмасы эшне ике ел эчендә төгәлләргә планлаштыра. Мәчет Ислам исемен йөртәчәк. Мәчетнең имам-хатыйбы да билгеле – Ринас хәзрәт Нәбиев. Бүгенге көндә Ринас хәзрәт Мөслим мәчетенең имам-хатыйбы булып тора.
Лилия Шәймиева фотосы.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев