Әмәкәй авылы кешесе янәдән исерек көе рульгә утырган

Мөслим районы прокуратурасы 48 яшьлек Мөслим районы кешесенә карата җинаять эше буенча дәүләт гаепләвен яклады. Суд аны РФ Җинаять кодексының 264.1 маддәсендә каралган җинаять кылуда (элек административ җаваплылыкка тартылган затның юл хәрәкәте кагыйдәләрен бозуы) гаепле дип тапты.

Суд билгеләгәнчә, 2019нчы елның 26 июлендә 11 сәгать 5 минутта элек исерек хәлдә автомобиль йөрткән өчен административ җаваплылыкка тартылган Әмәкәй авылы кешесе янәдән исерек көе рульгә утырган. Аны Мөслим-Әмәкәй юлының 43 километрында Октябрь авылы янында юл хәрәкәте инспекциясе хезмәткәрләре тутктата. Гаепле үз гаебен таныды.

Суд аны 3 елга транспорт чарасы белән идарә итүдән мәхрүм итте һәм 240 сәгать мәҗбүри эш рәвешендәге җәзага тартты. Карар үз көченә керде, дип хәбәр итәләр район прокуратурасыннан.

Фото-Pixabay.com