Милли уеннар гөрли

Сабан туен авыл има­мы Сөләйман хәзрәт ачты. Коръән сүрәләре дә укыды, вәгазь дә сөйләде хәзрәт. Алай гына да түгел, Сабан туе тарихына да тукталды. Шул рәвешле халкыбызның гореф-гадәтләрен саклауның әһәмияте турында аңлатты. Сабан туена җыелучыларны Иске Карамалы авыл җирлеге башлыгы Илнур Кәримов һәм район хаки­мияте вәкиле – Башкарма комитетның инфраструктур үсеш бүлеге җитәкчесе Дамир Мөхәмәтдинов сәламләде.

Бәйрәм милли уеннары белән күңелле. Капчык су­гышы, чүлмәк вату, капчык киеп, кашыкка йомырка са­лып йөгерү – уеннарның бер­се дә игътибардан читтә кал­мады. Башка җирлекләрдән аермалы буларак, Иске Кара­малы Сабан туенда ераклыкка бүкән ату ярышы да үткәрелә. Уенда катнашучыларга ничек­тер, читтән күзәтүчеләргә бик күңелле булды.

Сабан туеның төп бизәге – милли көрәш. Иске Карамалы Сабан туенда Яңа Карамалы оныгы Айдар Шәрифуллин ба­тыр калды. Батырга тәкә белән үлән чапкыч бүләк иттеләр.

Сабан туенда спорт ярыш­лары да оештырылды: гер күтәрү, кул көрәше, турник­та тартылу. Кыз балалар да турникта күтәрелде хәтта. Бүләкләр дә саллы иде. Татар­ча көрәш белән гер күтәрүдә җиңүчеләр телевизор белән бүләкләнде. Бүләкләрне “Аг­ромастер” җитештерү ком­паниясе генераль директо­ры Илгиз Исламов, Наил Мул­лин, “Август-Мөслим” ҖЧҖ һ.б. әзерләгән иде.

Ярышларда катнашучы­лар белән беррәттән җырлап- биеп күңел ачучылар да күп булды бәйрәмдә. Һәркем оста­лыгын күрсәтте. Сабан туе шуның белән матур, күңелле дә!

Ләйсән Сабирова фотолары.