Син – минем тормыш маягым, чынга ашкан хыялым!

Җирлегебездә төрле милләт вәкилләре яши. Татар, рус, керәшен, мари гаиләләренең үзләренә генә хас традицияләре, гореф-гадәтләре бар. Рус Шуган авылында гомер итүче Галина һәм Виктор Кривошеевлар рус халкына хас йолаларны үтәп яшәүче матур һәм үрнәк гаиләләрнең берсе.

ТОРМЫШ – УЛ "ҖИДЕ МИН"

– Тормыш иткәндә, “син” һәм “мин” дигән сүзләр онытылып, “без” дигән уртак сүз барлыкка килә. “Гаилә” сүзе рус телендә “семь я” – “җиде мин” мәгънәсендә яңгырый. Бергә тормыш итүебезгә биш дистә елга якын булса да, Галя минем өчен яшьлегемнең иң гүзәл чәчкәсе булып кала. Гомумән, гаиләнең элек-электән килгән асылы да шул бит: ишле булсын, үз түбәсе астында күп туганнарны берләштерсен, – ди Виктор Евгеньевич.

Галина Михайловна белән Виктор Евгеньевич икесе дә – Рус Шуган авылы кешеләре. Танышулары да авылда була. Егет кызны клубтан озата кайта да, шуннан соң гел аннан аерылмый.

– Кияүгә чыкканда, миңа 19 яшь иде. Виктор үзсүзле, игътибарлы булуы белән үзенә җәлеп итте. Туй ясарга кыстый башлагач: “Башта укуны тәмамлыйм әле”, – дидем. Витя миңа: “Укып бетергәч түгел, синең хәзер “әйе” дип җавап бирүең кирәк миңа”, – диде. Үҗәтлеге чиктән ашкан иде, – ди Галина Кривошеева, елмаеп.

Лилия Шәймиева фотосы

Тулырак «Авыл утлары» газетасыннан укыгыз