Әти-әниләр имтихан тапшырды

Тиздән, бик тиздән урта мәктәп укучылары бердәм дәүләт имтихан­нары тапшырачак. Укучылар бу төр тикшерүгә алдан әзерләнсә дә, имти­хан якынлашкан саен, борчылу тойгы­сы арта бара.

БДИга әзерләнгәндә мәктәп укучысының белеме генә түгел, пси­хологик халәте, кәефе, үз-үзенә ышанычның ныклыгы да зур әһәмияткә ия. Боларны булдыруда ата-аналарның роле бәяләп бетергесез зур.

Биремнәрне үзе чишеп, имтихан ал­дыннан балада була торган эчке халәтне, уй-кичерешләрне, борчылуларны өлешчә булса да үзе кичереп караган әти-әни, һичшиксез, баласының психологик ки­еренкелеген җиңәргә ярдәм итү ысулла­рын табачак, дип уйлый акцияне оеш­тыручылар. Шуңа күрә мәгариф һәм фән өлкәсендә күзәтчелек буенча федераль хезмәт мондый акцияне ел саен үткәреп килә.

Акция барышында әти-әниләргә им­тихан вакытында балалары узачак бар­лык этапларны үтү мөмкинлеге булды­рылды. Теркәлү, телефон һәм рөхсәт ителмәгән шәхси әйберләрне тапшы­ру, имтихан алды контроле, бланк ту­тыру, аларны тапшыру кебек процеду­раны алар үз күзләре белән күрделәр. Ата-аналар имтихан кабул итү пунктла­рында оештырылган иминлек чаралары, имтихан материалларының басылу һәм эшкәртелү тәртибе белән дә танышты.

Быел акциядә катнашучыларга 3-4 сәгать урынына 1 сәгать эшләүгә исәпләнгән база дәрәҗәсендәге һәм төрле типтагы математика биремнәре тәкъдим ителде. “Эшли алырмынмы, математи­каны укып чыкканыма ни гомер үткән”, – дип курыккан әти-әниләр биремнәрне билге өчен түгел, аларның эшли алырлык икәнен күрү һәм мәсьәлә-мисалларның төрләре белән танышу өчен башкарып ка­рады. Нәтиҗәләр акция көнендә үк бил­геле булды.

Башка еллардан аермалы буларак, укучыларның эшләре быел имтихан эшләнгән кабинетларда үк сканер аша үтәчәк. Бу исә оештыручыларга тагын да зуррак җаваплылык өсти.

Гөлназ Җәлилова.

Автор фотосы.