Халык актив җирлектә эш җайлы бара

Метрәй авыл җирлеге эшмәкәрләре белән дан тота. Биредә үз эшен алып баручы фер­мерлар да күп. Шул ук вакытта такта яручы, брусчатка, калай­дан тәрәзә наличниклары ясаучы­лар, сәүдә хезмәте күрсәтүчеләр дә аз түгел. Район җитәкчелеге дә: “Иң көчле эшмәкәрләр, фермерлар шушы җирлектә тупланган”, – дип билгеләп үтте.

Җирлектә яшәүче 1087 кешенең 556сы – эш яшендә. Мәктәп яшендәге – 109, мәктәпкәчә яшьтәге 73 бала бар. Балаларның күпчелеге район үзәгенә йөреп укый. Метрәй башлан­гыч мәктәбендә – 11, Сал.Мухан төп гомуми белем бирү мәктәбендә 22 укучы белем ала. Мәктәпкәчә яшьтәге төркемнәрдә 42 сабый шөгыльләнә (шуларның 30ы – Метрәйдә). Студент­лар саны – 35.

Метрәй авыл җирлеге яшьләрнең активлыгы белән аерылып тора. Кышкы спартакиадада ел саен при­злы урыннар алалар. Шуның өстенә үзләре спорт ярышлары оешты­ра. Сәнгать яратучылар активлыгы белән Метрәй халык театры төзелде һәм уңышлы эшли. Шаяннар һәм тап­кырлар бәйгесендә дә метрәйлеләр чыгышын халык ел саен көтеп ала. Кыскасы, афәрин, Метрәй яшьләре!

Җирлектә көнкүрештәге про­блемалар үзара салым хисабына хәл ителә. Урамнарны яктырту, су белән тәэмин итүдә проблемалар юк. Метрәйдә яшәүчеләр авылга ас­фальт юл кертүне сорый. Наил абый җирлекнең ветераннар советы рәисе вазыйфаларын Марс Тимергалиевкә йөкләргә тәкъдим итте. Шул ук ва­кытта Наил абый авыл халкын бердәм булырга чакырды. Ул күтәргән икен­че мәсьәлә инвалидлык алу турында иде. Әбелкирам абыйның соравы да шушы мәсьәләгә бәйле булып чык­ты: федераль ташламага ия булып та дару алып булмый. Сәбәбе нидә? Иль­мира Әюпова халык белән очрашуны Сал.Мухан авылында да үткәрергә тәкъдим итте. Метрәй авыл җирлеге советы һәм мәктәп коллективларына карата рәхмәт сүзләре дә яңгырады җыенда.

Яңа Усы авыл җирлегендә 284 кеше яши (теркәлүчеләр – 373 кеше). Эш яшендәгеләр – 183 кеше, балалар саны – 57.

– Җирлек тормышында кече эшмәкәрлек һәм шәхси ярдәмче хуҗалыклар зур роль уйный. Җирлектәге 187 шәхси хуҗалыкта 145 эре терлек асрала. Дуңгыз үрчетүчеләр, кошчылык, умартачы­лык белән шөгыльләнүчеләр бар. Бер гаилә фермасы эшли, – ди җирлек башлыгы Галина Романова.

Җирлектә җиде эшмәкәр теркәлгән һәм эшмәкәрлектә 47 кеше эш урыны тапкан. Рафил Нуретдинов фермер хуҗалыгында 12 кеше эшли.

Үзара салым хисабына юл­лар ремонтланган, яктырткыч­лар алыштырылган, территория төзекләндерелгән, уен мәйданчыгы булдырылган, урам күрсәткечләре ясалган. Электр энергиясе, газ һәм су белән тәэмин итүдә өзеклекләр юк. Халык эчәргә яраклы суны нигездә ихатасындагы шәхси коедан ала. Халык тормыш-көнкүрешеннән канәгать. Җыенда халыктан сора­улар кермәде, дияргә була. Урман­да җәнлекләр кимү мәсьәләсе генә кузгатылды. Җитәкчелек мәсьәләне контрольгә алырга ышандырды.

Римма Афзалова.

Фото – Метрәй авыл җирлеге архивыннан.