Алтын балык артыннан.ФОТОРЕПОРТАЖ

Бәйгедә Сарман районы, Яр Чал­лы шәһәре балыкчылары да катнаш­ты. Балыкчыларны котларга район җитәкчелеге дә килгән иде. Фести­вальне ачып, чараны оештыручылар балыкчыларга яхшы кәеф теләде.

– Балыкчыга яраткан шөгылендә уңышлар теләргә ярамый. Ырымнар­га балыкчы белән аучыдан да ныграк ышанучы юктыр. Гадәттә, русчалатып, “ни хвоста, ни чешуи” дип телиләр. Бу очракта, янәсе, су иясе балыкчы су ко­енырга гына бара дип уйлап, балык­ны яшерми. Бу – бик борынгыдан кал­ган ышану. Ләкин балыкчы ырымнар­га ышанып яши. Балык тоту минем өчен елның һәр фасылында яраткан шөгыль булып кала, – ди Азат Шабаев.

Бәйгедә, гадәттәгечә, җиңүчеләр билгеләнде, алты номинация буен­ча алдынгы балыкчылар ачыклан­ды. Беренче урынны Иске Вәрәш авы­лыннан Әлфис Садретдинов алды. Ул “Иң зур балык” номинациясендә дә җиңүче булды. Мөслим гимназиясенең 5 сыйныфында укучы 12 яшьлек Бу­лат Бәдретдинов икенче урын­ны яулады һәм “Иң кечкенә балык” номинациясендә дә беренче булды. Бу­лат бәйгегә әтисе Ранис белән төшкән иде.

– Тормыш иптәшемнең балык то­тарга яратуы улыбызга да “йоккан”, күрәсең. Җәй көне походка йөрсәләр, кышын урманга чыгалар, күрше рай­оннарга балыкка йөриләр. Ата белән ул гына түгел, сердәшләр һәм якын дус­лар да алар. Улымның шул рәвешле чыныгып, тормышка өйрәнеп үсүенә мин бик шат. Телевизор каршында яисә гаджетларга “табынып” утырган­чы, баланың саф һавада булуы күпкә отышлы, – ди Диләрә Бәдретдинова.

Бәйгедә өченче урынны Рафис Нургалиев алды. “Иң яхшы бораулау­чы” номинациясендә Раил Гыйзетди­нов җиңүче булды. “Балыкчы леди” – Лилия Аверс. Моннан берничә ел элек җирлегебезгә Санкт-Петербург шәһәреннән күченеп кайткан кыз – күптән инде үзебезнеке!

– Бәйрәмдә катнашучылар саны арта. “Таң” аланы халыкның ял итү урынына әйләнгән икән, димәк, фе­стиваль озын гомерле булачак. Бу чара быел да район яшьләр белән эшләү һәм спорт бүлеге белән берлектә оешты­рылды. Иганәчеләребез Игорь Бубе­ков, Эдуард Батталов, Рүзәл Исанаев, Алмаз Гыйльфановка рәхмәтебезне җиткерәбез, – диде ДОСААФның рай­он бүлеге җитәкчесе Марат Бәйрханов.

Райондашыбыз Өлфәт Мирга­зизов быел да “Иң өлкән балыкчы” номинациясендә җиңү яулады. 80 яшь­лек Өлфәт абыйны яраткан шөгыле егетләрчә яшь итеп саклый, күрәсең.

“Иң кечкенә б алыкчы” номинациясендә икенче сыйныф укучысы Аида Әлмәтовага тиңнәр булмады. Әтисе Руслан белән Аида фестивальдә ел саен катнаша.

Җиңүчеләргә яшьләр белән эшләү һәм спорт һәм ДОСААФның район бүлегенең грамоталары, иганәчеләрнең истәлекле бүләкләре тапшырылды. Мөслим гимназиясенең физкультура укытучысы Ирек Са­дретдинов пешергән тәмле уха белән фестивальдә катнашучылар гына түгел, чараны тамаша кылырга килүчеләр дә сыйланды.

– Мөслимдә һәр чара зур оешкан­лык белән үтә. Сезнең районда үткән спорт ярышларында да катнашырга туры килде. Бик яхшы каршы алалар, сыйлап озаталар. Әбигә кунакка кайт­кан кебек. Кунакчыл халкы белән ае­рылып торучы мөслимлеләргә алга таба да уңышлар телибез, – ди Сарман районы ир-егетләре.

Лилия Шәймиева.

Автор фотолары.