Күренеп тор!

Җәяүлеләр катнашындагы юл-транспорт һәлакәтләренең төп өлеше тәүлекнең караңгы вакытына туры килә. Караңгыда машина йөртүчеләр җәяүлеләрне күрмәскә мөмкин. Уңайсыз һава шартлары – яңгыр, җепшек кар, томан һәм җәяүлеләрнең өс киемендә яктылык кайтаручы элементлар булмау да һәлакәтләргә сәбәп булып тора. Статистика буенча яктылык кайтаручы элементлар файдалану җәяүлене таптау куркынычын 65 процентка киметә.
Мөслим лицееның яшь инспекторлары киемнәрдә яктырткыч элементларны популярлаштыру максатыннан “Яктырак бул! Күренеп тор!” исемле акциягә чыктылар. Кулларына яктырткыч элементлар тоткан балалар җәяүлеләргә район юлларындагы вәзгыять турында мәгълүмат бирделәр, юл хәрәкәте иминлеге буенча статистика күрсәткечләрен җиткерделәр, яктырткыч элементлар кулланырга чакырдылар. Караңгы төстәге кием кигән җәяүлеләргә яктырткычлар да тараттылар.
Алсу Ситдикова, 
“Юл хәрәкәте иминлеге” ДБУнең Сарман һәм Мөслим районнары буенча бүлекчә җитәкчесе.