Юбилее белән котлап

Бүген Мөслим картлар һәм инвалидлар интернат-йортында гомер итүче тыл һәм хезмәт ветераны Гайнетдинова Зәйнәп Зәетгәрәй кызының 90 яшьлек юбилеен билгеләп үттеләр.
Юбилярны истәлекле вакыйга белән Мөслим картлар һәм инвалидлар интернат-йорты директоры Гөлнар Шакирянова котлады. Ул ветеранга Россия Федерациясе Президенты Владимир Путин исеменнән котлау открыткасы, Мөслим муниципаль районы хакимияте башлыгы Альберт Хуҗин исеменнән истәлекле бүләкләр тапшырды.
Юбилярны котларга авылдашлары да килде. Котлаулар концерт номерлары белән үрелеп бардылар. Зәйнәп Гайнетдинова рәхәтләнеп хатирәләре белән уртаклашты, интернат-йорт хезмәткәрләренә кайгыртучан һәм җылы мөнәсәбәттә булулары өчен рәхмәт белдерде.
Юбилярыбыз тырыш хезмәте өчен ул күп тапкырлар Рәхмәт хатлары, Мактау грамоталары, юбилей медальләре белән бүләкләнгән.
2018 елның ноябреннән Мөслим картлар һәм инвалидлар йорты-аның икенче гаиләсе. Ветераныбыз бүгенге көнгә кадәр аралашучан һәм шат кеше күңелле булып кала.
Зәйнәп апаны матур бәйрәме белән котлыйбыз. Исәнлек-саулык телибез!