Бакчачыга киңәшләр

♦        Яхшы орлыкларның тишелеше: укропның 35-55%, пастернак-40-70%, петрушка, кишер-45-70%, кәбестә, төче торма, әче торма, чөгендер, сельдерей, кузгалак, помидор - 60 % һәм күбрәк, кавын, кабак - 75-95 %, борчак, шалканның 90-95 % тәшкил итә.

♦       Кибетләрдән сатып алынган орлыклар зарарсызландырылган була, шуңа күра бу процедураны кабатлап тору кирәкмәс, югыйсә орлыкларның тишелеше кискен кимиячәк.

♦       Кыяр, ташкабак, патиссон, кабак орлыкларын чәчүгә 1,5-2 ай алдан әзерли башларга мөмкин. Моның өчен аларны тукыма капчыкка салып, җылыту батареялары янына урнаштыралар. Температура даими - 20 градустан түбән булмаска тиеш. Орлыкларны җылыту уңышны иртәрәк алу мөмкинлеген бирәчәк.

♦       Бүрттерелгән, шыттырылган орлыкларга аерым игътибар кирәк; туфракта дым җитмәсә, аларның тишелеп чыгуы начар булачак. Шыткан орлыкларны җитәрлек дымлы туфракка чәчеп, кояш бик тиз генә туфракны киптереп бетерсә дә, бу орлыклар һәлак булырга мөмкин.

♦Кайбер орлыкларның кабыклары яфракларыннан төшмичә тора. Бу туфракның бик йомшак булуыннан яки сай чәчелүдән килә. Үсемлеккә булышырга кирәк - пипетка белән бер тамчы гына җылы суны кабыкка тамызырга кирәк, кабыгы төшкәнче бу процедураны берничә тапкыр кабатлыйлар.

Наилә Сәлахова фотосы