2025 елда Мөслим районында юл ремонты: Альберт Хуҗин яңалыклар белән бүлешә

Район башлыгы Альберт Хуҗин үзенең социаль челтәрләрдәге сәхифәләрендә 2025 елда районда башкарылачак юл ремонты эшләре хакында язды.

Мөслим районы федераль һәм республика программаларына кушылган.

Районга бу максатлар өчен 1 млрд. сум бүленеп бирелгән. Быел әлеге һәм муниципаль юл фонды средстволары хисабына түбәндәге эшләрне башкару планлаштырылган:

– Ык елгасы аркылы салынган күпергә капиталь ремонт (урау юл Мәлләтамак күпере аша узачак);
– Өченче урау юлны асфальтлау;
– Мөслим-Тат. Шуган юлының беренче километрын ремонтлау;
– Үрәзмәт-Октябрь арасындагы юл ремонтын башлау (биредә асфальт-бетон катлам булачак) ;
– Мөслим-Яңа Сәет юлының Симәккә кадәрге өлешен ремонтлауны дәвам итү;
– Мөслимнең "Аэропорт" микрорайонындагы урау юлга һәм Хәбибуллин урамына асфальт җәю;
– З. Басыйрова урамын Икенче урау юл белән тоташтыру;
– Мөслим гимназиясе машина стоянкасын һәм аннан төп юлга чыгу юлын асфальтлау;
– Таулы урамындагы юлны асфальтлауны төгәлләү һәм "Яңарыш" микрорайонындагы күпбалалы гаиләләр өчен бүлеп бирелгән җир кишәрлекле урамны формалаштыру;
– Хаертдинов урамындагы юл ремонтын төгәлләү.

10 апрельдән Мөслимдә чокыр ремонты башланыр дип көтелә. Район үзәгендәге 16 км юлда асфальт ямалачак. Чокыр ремонты өчен асфальт валчыгы әзерләнгән.

"Хәзерге вакытта кайбер участоклар авария хәлендә, шулай да бераз сабыр итүегезне сорыйбыз", - ди район башлыгы.

Юллар торышы, аларны ремонтлау һәм юл белән бәйле башка сораулар буенча (885556)2-58-57 телефон номеры аша район Башкарма комитетының инфраструктур үсеш бүлегенә мөрәҗәгать итәргә мөмкин.

Фото - Мөслим-информ архивыннан.