Салкынга чыдам яшелчәләрне утыртырга вакыт

Май бәйрәмнәрендә өстәлегездә үзегез үстергән яшел салат, суган, шпинат, редис кебек яшелчәләр булсын, дисәгез, аларны теплицага утырту турында алдан ук кайгыртырга кирәк. Кояш кыздыра башлады, ә теплицага керткән кар һаман эреп бетми, дисезме? Кар тиз эресен һәм җир тизрәк җылынсын өчен март урталарында теплица эчендәге түтәлләргә кара пленка ябарга кирәк. Тышта кар ятса да, кояшлы көннәрдә теплицадагы җир бик тиз җылына.

Быел яз иртә килә, март уртасында салкынга чыдам яшелчәләрне утырта башларга да була. Түтәлгә орлыкларны чәчкәндә шуны исәпкә алыгыз: беренче уңышны җыеп алгач, аның урынына помидор һәм кыяр үсентеләре чыгарып утыртырлык булсын. Мәсәлән, беренче түтәлгә — шпинат, уртага — суган, аның янына редис утыртырга була. Янәшәдәге түтәлгә рассада өчен кәбестә, уртада — салат, янына брокколи, өченче түтәлгә — укроп, пекин кәбестәсе, петрушка һәм башка тәмләткечләр чәчәргә мөмкин.

Орлыкларны чәчеп, су сипкәч тә түтәлләр өстенә лутрасил каплагыз. Түтәл кибеп китмәсен өчен әледән-әле лутрасилны ачып, җылы су сибәргә онытмагыз. Бигрәк тә редис кипкән җирдә уңыш бирми.

Май башында редис, суган, яшел тәмләткечләрне йолкып алып, алар урынына өйдә үстергән помидор үсентесе чыгару бик уңайлы. Гадәттә, иртә яздагы эшләр поликарбонат белән ябылган теплицаларда гына башкарыла. Пленка белән ябылган теплицаларга яшелчә соңрак утыртыла.

Чыганак:https://kiziltan.ru/articles/poleznoe/2025-03-13/yazgy-eshl-rne-teplitsadan-bashlyyk-4156287?clckid=40edfce3

Оксана Исламова фотосы