Томалап пешерелгән куян ите

Кирәкле ингредиентлар: куян ите, сары май, өч аш калагы каймак, уртача зурлыктагы 1-2 кишер, шул ук күләмдә башлы суган, 1 аш калагы томат пастасы, ит шулпасы, тоз, төелгән кара борыч.

Әзерләү тәртибе. Яхшылап юылган куян түшкәсен өлешләргә бүләбез. Һәр кисәкне тоз, борыч сибеп ышкыйбыз да сары май салынган тирән кәстрүлгә тезәбез. Өстенә боҗралап туралган суган һәм кишер, каймак, томат пастасы, ит шулпасы салабыз. Тоз, борыч сибәбез дә өстен ябып духовкага куябыз. Ит духовкада 2 сәгать чамасы томаланып пешәргә тиеш. Итне табынга кайнар килеш, куе яшелчә соусы белән бирәбез. Аерым савытта эре итеп турап кыздырылган бәрәңге чыгарабыз. Тәмле булсын!

Фото –  А.Зиннурованың шәхси архивыннан.