Татарстанда 2030 елга кадәр буллинг белән көрәшү планын кабул иттеләр

Документ нигезендә, 2030 елга медиатив практикалар (татулаштыру программалары) кулланган мәктәпләр һәм социаль учреждениеләр өлеше 15 проценттан 35 процентка кадәр артырга тиеш. Буллингны ачыклау һәм агрессорлар һәм корбаннар белән эшләү буенча укулар узган белгечләр саны 850 дән 950 кешегә кадәр артачак.

Юл картасы интернетны мониторинглауны күздә тота: «Навигатор» ДБУ белгечләре мессенджерлар һәм социаль челтәрләрдә кибербуллинг һәм деструктив контентларны күзәтеп торачак. Ел саен 15,5 меңгә кадәр шундый материалны ачыклау һәм блоклауга җибәрү планлаштырыла. Шулай ук балаларны өстәмә белем бирү системасы белән тәэмин итүне ел саен арттыру каралган.

Карардагы мәгълүматларга караганда, биш ел эчендә балалар, ата-аналар һәм педагоглар өчен 350 меңнән дә ким булмаган профилактик чаралар һәм консультацияләр үткәрү планлаштырыла. Финанслау гамәлдәге бюджетлар кысаларында кала. Үтәлешне контрольдә тоту ТР Мәгариф һәм фән министрлыгына йөкләнгән. Җаваплы ведомстволар, Сәламәтлек саклау министрлыгы, Хезмәт министрлыгы, Эчке эшләр министрлыгы һәм прокуратураны да кертеп, хисапларны һәр елның 1 февраленә кадәр тапшырачак.

Карарда билгеләп үтелгәнчә, хәзер дөньяда һәр унынчы укучы даими рәвештә яшьтәшләренең агрессиясе белән очраша. Югары куркыныч төркеменә 11-12 яшьлек балалар эләгә: аларның 28 проценты соңгы елда кимсетүләр белән очрашкан.

Фото: © «Татар-информ», Владимир Васильев