Мөслимем – гүзәл ягым!

Мөслим ягы гүзәл табигате, ачык күңелле, тырыш, үзләренең акыл сәләте һәм хезмәт сөючәлеге белән рухи һәм матди байлыклар тудыручы уңган кешеләре белән данлыклы.

Агыйдел һәм Ык, Мәллә елгалары буенда борынгыдан ук төрки халыклар тупланып яшәгәннәр- иген иккәннәр, терлекчелек белән  шөгыльләнгәннәр, көнкүреш өчен кирәкле әйберләр җитештерүче һөнәрчеләре дә булган.

Республикабызның көнчыгышындагы Мөслим районы әнә шул төбәктә урнашкан. Ашкынып аккан дәртле һәм гүзәл Ык, Мәллә елгалары, җырларда җырланган  матур әрәмәләре, җиләкле аланнары, шифалы чишмәләре, тал-тирәкле тугайлары, шаулы урманнары белән бер күрүдә һәркемне әсир итәрлек төбәк ул.