“Яшел елан”га алданмагыз

Суд карары нигезендә шундый бер райондашыбыз – ун тәүлек “утырып” чыгарга, җиде кеше штрафны икеләтә арттырып түләргә мәҗбүр булды. 
– Ел башыннан алкоголь кулланган 27 шофер тоткарланган. Алкоголь кулланып руль артына утырган бер райондашыбыз – берничә ай элек суд карары белән машина йөртү таныклыгыннан ел ярымга мәхрүм ителгән кеше. Кылган гамәле, күрәсең, сабак булмаган, – ди районның ДАИ җитәкчесе Феликс Мәгъданов.
Минутлык ләззәткә алданып, “яшел елан” колына әйләнгәнен күпләр абайламый да кала.
– Март аенда тоткарланган бер егет, ДАИ инспекторларыннан качмакчы булып, машина багажнигына кереп утырды. Руль артындагы егетнең машина салоны аша багажникка качуы кызык та, кызганыч та. Тагын шунысы кызыклы: спиртлы эчемлекләр кулланган килеш машина йөртүчеләр төшемле эштә эшли, һөнәрләре сәфәрләр белән бәйле, – ди Феликс Мәгъданов.
Узган ялларда алкоголь кулланган килеш тоткарланган 1968 елгы райондашыбыз үзенең хаклы булуын исбатларга тырышып: “Туган көнем иде бит! Бер генә “ярты” эчкән идем, җибәрегез инде”, – дип инспекторга ялына. ДАИда теркәлгән видеоязмаларда алкоголь кулланган шоферларның барысы да диярлек башта үзләренең эчмәгәнлекләрен аңлатырга тырыша. Аннары әкренләп һөҗүмгә күчә: “Син минем кем икәнне беләсеңме?”, “Фәләнгә шалтыратам хәзер”. Бу сүзләрне күп ишеткән ДАИ инспекторларының беркетмә тутыра башлаганнарын күргәч: “Җибәр инде, абый”, – дип ялына башлыйлар. 
– Берәр чара, бәйрәм булса, табын түренә аракы куймый калмыйлар. Дуслар, туганнар бер-берсен шулкадәр сыйлый ки, аякларында басып тора алмасалар да, рюмкага үреләләр. Кибетләр хәзер адым саен, барысы да алкоголь белән сату итә. Кеше нигә эчмәсен?! Көмешкә куып сатучылар да байтак, – ди райондашыбыз Рәзилә Галиуллина.
Җирлегебездә юл хәрәкәте кагыйдәләрен үтәргә теләмәгән машина йөртүчеләр һәм җәяүлеләр дә бар. Рейдлар барышында теркәлгән иң күп хокук бозулар – шоферларның иминлек каешын эләктермәве һәм балаларны махсус креслодан башка йөртүе. Узган атнада “Иминлек каешы” операциясе вакытында – 52 (!) шоферга, “Тонировка” профилактик чарасында 5 машина йөртүчегә административ беркетмәләр төзелгән. Юлны дөрес урында чыкмаган сигез җәяүле административ җаваплылыкка тартылган.

Лилия Шәймиева фотосы